2015年5月10日 星期日

媽媽的矛盾

襯母親節...出返篇媽媽的矛盾﹗

其實最近有少少不開心,阿旺不太認同我的教囡方法,話我太惡...唉...邊個女人想自己係老公的心目中是一隻 "老虎毑" 吖,但做人阿媽真是非常艱難﹗我都唔想惡,我都唔想個囡怕咗我,每日放工返屋企,大頭妹會以 9秒9的速度,同我講佢已經做晒功課,可能因為先一陣子我每日返屋企,就只會問佢做晒功課未﹗

之前有講過,大頭妹是 "聽覺學習型",我帶過大頭妹去 KEN SIR 的 "型出個未來",大頭妹做完個 TEST (不是真的什麼TEST啦﹗只是小朋友一邊玩,KEN SIR一邊觀察)。之前都講過,大頭妹寫中文好差,後來上網睇資料睇到,佢應該是因為 "手眼不協調" (K1班主任有講過,K2的成績表手眼協調都比較低分,得 2*,其他都 3*),所以寫得唔好。最明顯的感覺是,每次教佢寫字,都會心諗有冇搞錯呀?﹗你對眼唔睇野架咩?﹗明明老師咁寫,你點解會寫到咁架?﹗

上面講兩樣野好似無關?非也非也﹗之後我開始試佢一邊寫一邊讀筆劃比佢聽,發覺佢真是有進步﹗所以之後佢一寫中文字,我就坐係旁邊不停 "叫喊",例如: "直﹑橫折﹑關門" (即是: 口),左啲﹑右啲﹑上啲﹑長啲...之類...。其實即是好似男人睇波咁之嘛﹗同樣原理﹗有時都會越叫越大聲,拍下枱拍下櫈﹗最後,大頭妹寫字進步咗,最近幾個月開始,仲自己中午做好功課,我返屋企只是對功課,簽個名就完成 (我問過佢...佢話唔想我勞氣...)﹗不過就換來阿旺話我教囡太惡,上次在 FACEBOOK 貼了大頭妹寫自己個名的相,之後有朋友見到讚大頭妹寫得靚,阿旺竟然答 "梗係啦﹗又打又鬧﹗"。我知是言者無心,聽者有意。不過其實我想講,教大頭妹寫名,我真是花了很多心機,基本上 K2 上學期開始學寫字,我就將佢個名拆開,不停寫 "木﹑田﹑水﹑中﹑布" ,呢幾個字,本身老師都有教都要寫,只是功課以外,再寫多少少,所以到佢開始寫名,真是一寫就上手。

作為一個雙職媽媽,我覺得我花在 2個囡身上的時間,真是多得無可再多,平時買野學野,就一定慳自己都想比最好的佢地﹗每日放工最少花一個小時陪大頭妹做功課加溫習,真是溫習的溫習,會同佢讀一次,再問下生字。最近開始串字﹑同默書 (我同大頭妹講玩遊戲,同埋如果佢唔識,我會提佢 phonics sound,當順便溫埋 phonics。)。我自問做唔到 100分,都應該有 80分...點知我老公唔認同我﹗

最後襯母親節,都希望同各位媽媽講聲努力加油,男人睇完呢篇 blog 嘅,就惜多啲老婆,我地女人為頭家真是付出好多﹗唔望咩回報,只是想要個認同啫﹗



5 則留言:

  1. Happy Mother's Day, Athena! Don't worry, i am sure you are less 'monster' than many other parents! I agree with you, you are a very dedicated mother!

    回覆刪除
  2. 我都係要返工既MAMA仲要無工人姐姐, 我好明白你感受, 自己好努力付出左, 而另一伴仲講D 負面說話, 唉!!!!不過唔好放係心上, 加油做返自己就得啦

    回覆刪除
  3. 十分明白你處境! 因為我都係一樣, 教阿女有時真係教到好嘔血! 辛苦過返工!

    回覆刪除
  4. 雙職媽媽其實真係好辛苦架, 爸爸係唔會明白的!! 我讚同適當的嚴厲教導係必要的,小朋友太易心散了, 所以你要加油呀! Support Support!

    回覆刪除
  5. 哈...好人梗係易做啦! 不過在家裏總有反派, 媽咪陪得仔女多, 由我地做反派, 仔女易接受D. 不過, 仔囡大, D火真係要收下. 慢慢收啦....

    回覆刪除

Related Posts Plugin for WordPress, Blogger...