2018年10月8日 星期一

星期日出山(南乳雞翼、芝士雞肉餅、炒菜心)



最近『學校飯盒』鬧得滿城風雨,其中好深刻...有個 facebook page 講到,啲媽媽小朋友 bb時,就咩都organic...何解上到小學比佢地食 $17個隔夜飯盒?﹗哈哈哈﹗又真係喎﹗其實大頭妹時我緊張啲,真係又organic,又日本蔬果,後來因為福島事故,無再一定要食日本的菜,到依家其實我連我工人每日下午煮咩比 2個女食,我都唔係好知。但又好衰唔衰,咁岩我暑假時問過2次,1次是『粟米湯』撈飯...無肉無菜,就係罐頭粟米湯同飯,有一日就食隔夜節瓜加午餐肉,真是嬲到震﹗又後我叫老公轉由每次比 $500,變每日 $200咁比,每日問下工人下午煮咩比兩個女食﹗

其實我自己就一早都是預比大頭妹帶飯,佢地學校一至三年級都是半日,明年四年級先全日,所以打算由依家起,星期日就試下菜,睇下有咩岩帶返學校食,又岩大頭妹的口味﹗今日先試『芝士雞肉餅』,是以前跟日本老師學,日本人一向食凍便當,佢地會比較了解咩食材放涼咗都好味﹗

上面是買街現成的,芋頭肉餅,下面是我新鮮整的芝士雞肉餅﹗


其實熱至暖食時,芝士是流心的﹗


今次是 apita 買免治雞肉,用的是雞胸肉,阿旺話可以加啲雞腿肉,但其實就是因為要試凍食效果先要用雞胸肉,雞腿肉脂肪比較多,熱食時一定好味過雞胸肉,但凍食時,雞胸肉反而會比教好﹗加入咗一個蛋黃,其實一定唔會『鞋』,不過又一定唔會好似雞腿肉咁 juicy﹗ 醃料都是簡單的豉油﹑糖﹑胡椒﹗


我今次整 4件,用一片芝士都夠,其實加唔加都可以,加其他配料亦可以,好似紅蘿蔔﹑豆渣,都可以﹗


試下帶飯的份量﹗


另外煮咗南乳雞翼,好耐無煮過比阿旺食﹗以前是佢NO. 1最愛﹗


之前的BLOG應該有食譜,唔打多次啦﹗


之前買咗呢包,因為想星期日煮返飯,想睇下有冇啲簡單方便,阿旺話星期日可以煮啲複雜啲,但我成日覺得煮得太複雜,一定唔長遠...其實大頭妹2年級後,我星期日都好似無煮過飯了﹗5隻手指應該數得晒﹗


煮完飯的一刻,自己不得不讚下自己,個廚房幾乾淨,想當年練咗好耐先練到呢個效果﹗我今次是先煎雞肉餅再煎雞翼,煎雞翼時就洗晒之前醃雞翼﹑雞肉餅的碗碟,到最後炒菜時就洗埋個煎PAN,煮完菜就係得炒菜個鑊﹗當年姑媽話煮婦要做到呢個效果﹗唔係一陣一次過洗時又辛苦,又花時間﹗


今個星期又要PLAN 下星期日煮咩啦﹗

沒有留言:

張貼留言

Related Posts Plugin for WordPress, Blogger...