傻夫婦一家四口生活日誌: 晚餐

顯示具有晚餐標籤的文章。顯示所有文章

2017年7月28日星期五

傻夫婦東京親子之旅 DAY 2 晚餐【牛かつ AONA】(吉列牛)

2017年 7月 15日 (星期六)

平時通常第一餐我就會食豪啲，今次一落機先去箱根已經食咗自助晚餐，所以出返東京第一晚，就揀咗食吉列牛，阿妹話上野有一間好正，佢岩岩去完唔夠時間排隊入去食，不過我今次唔去上野，所以係新宿找一間就算了﹗其實基本上成個新宿都有好多間吉列牛，我之前上網睇咗，專登行去，之後先發現，其實單單新宿都已經幾間分店同其他吉列牛店，根本唔洗行咁遠﹗

第一次食吉列牛，平時都係食吉列豬多，我覺得都好味，但就無想像中咁驚喜，而我同阿旺都比較鍾意食燒牛，或者 SUKIYAKI﹗哈哈﹗之後我地都去了晴空塔的【敍敍苑】食燒肉，最後又係羽田機場食【今半】 SUKIYAKI﹗

牛カツレツセット 1300YEN，見有啲汁，打算點比大頭小丸食，點知兩個都唔食﹗大頭妹依家成日都出『絕招』，話自己唔想傷害動物唔食肉﹗﹗﹗但佢又唔食菜架喎﹗﹗﹗咁佢即係想食咩呢？﹗餐餐食白飯？﹗比佢激死﹗﹗﹗

其實最後我同阿旺食咗，都好好味﹗個汁真是好正架﹗入面好似是炸漢寶扒，所以好腍，唔明點解大頭妹都唔食﹗小丸子就係因為食咗我份霜降黒毛和牛，所以唔肯食呢份﹗佢真是好識食﹗

去到日本，真是連食個沙律都新鮮啲﹗

我同阿旺都是點了【霜降黒毛和牛】2300YEN，好好味，小丸子一個人食咗半份，其實佢應該食到一份，不過我見有啲肉好生，唔敢比佢食﹗

十六穀米

睇下佢個『衰樣』就知佢的評分，個樣越衰代表越好味﹗我睇佢都好滿意今餐﹗

食白飯的女孩﹗我唔怪佢，都知佢唔食肉，其實應該同佢去食壽司既﹗

之後買返個 MISTER DONUT 比大頭妹補數﹗

經過百果園，仲買咗 pack 桃﹗1500YEN 2個好大個，不過唔係太甜，之後有一日係超市買的好甜，下次都係去返超市買﹗又平﹗只是 500YEN 就有 2個﹗

牛かつ: http://www.jfoods.co.jp/menu.html

2017年1月3日星期二

結婚週年晚飯【La Vache!】@20161213

2016年 12月13日(星期二)

2016 年真是不太 productive 的一年，今年出的 blog，真是自正式寫 blog 以來，出產最少的一年﹗12月撞正工人姐姐返菲律賓放假，我自己又放埋長假湊女，出 blog 的數目真是少之有少﹗呵呵呵﹗希望 2017 新一年會勤力點啦﹗我個草稿箱真是已經爆滿啦﹗新一年的第一篇 blog，寫返 12月的結婚週年晚餐﹗

今次又再去我生日時去的的 La Vache﹗因為我間中都會忽然好想吃牛扒，La Vache﹗的價錢不算貴，食物亦有質素，所以想起慶祝就會想起它，而且地點很近我公司好方便﹗La Vache﹗只有一個餐 $298 +10%/位，只需要揀扒要幾多成熟就可以了 (不包括飲品)﹗

麵包的牛油超級好味﹗

沙津沒有特別，不過吃牛扒﹑薯條之前，當打個底，少點『罪惡感』，其實只是自欺欺人﹗

阿旺好型地點了 still water，其實...餐廳有免費水的﹗

我...如常飲可樂，吃薯條要飲可樂﹗

牛扒的質素真的不錯﹗這裡是 2份呵﹗不過侍應已經分了每人 2塊放在我們的碟子上﹗

今次點了 medium rare﹗

餐廳已經坐滿人，不好意思拍照﹗結婚 9週年快樂﹗

好似 6人以上才可以訂枱，我們放工行過去， 6:30 前 walk-in 一般都有位，6:30後好快就會滿坐啦﹗

La Vache﹗
地址: 中環蘇豪卑利街48號地下
電話: 28800248
openrice: https://www.openrice.com/zh/hongkong/r-la-vache-%E4%B8%AD%E7%92%B0-%E6%B3%95%E5%9C%8B%E8%8F%9C-r155310

大家 like 咗我地 facebook page 未呀？﹗未就快啲 like 啦﹗

2016年7月28日星期四

傻夫婦九州親子之旅 DAY 4 【晚餐: 大東園】

2016年 7月 13日 (星期三)

【大東園】是今次行程的重點晚餐之一，原本是安排在第 2晚，因為如果好食，可以再 ENCORE，但因為要去睇熊本熊，所以要改係第 4晚食，之前一日叫酒店的職員打去幫我地訂枱，去到又唔算 FULL (上網睇話要排隊)。另外，都想提下帶小朋友的家庭，日本唔係全部餐廳禁煙，所以訂枱時最好加多句 NON SMOKING，睇下有冇機會安排到，餐廳今次就安排了一張 "自成一角" 的位置比我地，都唔錯，又唔怕大頭小丸嘈到人﹗

"自成一角" 的位置﹗

原來想點『宴席料理』，但店員用非常有限的英文，加大量日文表示，宴席料理的份量好少，另外有 2-3人的拼盤，份量會大啲。最後乖乖聽話點了一個主要有牛，另有少少內臟的拼盤，打算睇完覺得邊樣好味就再點﹗最後我用日文同店員講要『水』，佢一聽到我講日文就好開心，不過我的日文，就只是夠我叫杯水﹗哈哈哈﹗佢開心得太早了﹗

一上枱真是心心眼，日本人就是有本事做到上枱個碟同 MENU SHOW 出嚟既是一樣﹗拼盤有: 牛肋骨﹑肉眼﹑牛舌﹑牛腸﹑牛肚﹗食完燒牛腸之後，阿旺愛上咗，原本我叫佢食『牛腸鍋』，佢話唔食，結果食完燒牛腸話聽日最後一晚去食牛腸鍋，佢話牛腸是『福岡男人的浪漫』﹗