傻夫婦一家四口生活日誌

2017年7月28日星期五

傻夫婦東京親子之旅 DAY 2 晚餐【牛かつ AONA】(吉列牛)

2017年 7月 15日 (星期六)

平時通常第一餐我就會食豪啲，今次一落機先去箱根已經食咗自助晚餐，所以出返東京第一晚，就揀咗食吉列牛，阿妹話上野有一間好正，佢岩岩去完唔夠時間排隊入去食，不過我今次唔去上野，所以係新宿找一間就算了﹗其實基本上成個新宿都有好多間吉列牛，我之前上網睇咗，專登行去，之後先發現，其實單單新宿都已經幾間分店同其他吉列牛店，根本唔洗行咁遠﹗

第一次食吉列牛，平時都係食吉列豬多，我覺得都好味，但就無想像中咁驚喜，而我同阿旺都比較鍾意食燒牛，或者 SUKIYAKI﹗哈哈﹗之後我地都去了晴空塔的【敍敍苑】食燒肉，最後又係羽田機場食【今半】 SUKIYAKI﹗

牛カツレツセット 1300YEN，見有啲汁，打算點比大頭小丸食，點知兩個都唔食﹗大頭妹依家成日都出『絕招』，話自己唔想傷害動物唔食肉﹗﹗﹗但佢又唔食菜架喎﹗﹗﹗咁佢即係想食咩呢？﹗餐餐食白飯？﹗比佢激死﹗﹗﹗

其實最後我同阿旺食咗，都好好味﹗個汁真是好正架﹗入面好似是炸漢寶扒，所以好腍，唔明點解大頭妹都唔食﹗小丸子就係因為食咗我份霜降黒毛和牛，所以唔肯食呢份﹗佢真是好識食﹗

去到日本，真是連食個沙律都新鮮啲﹗

我同阿旺都是點了【霜降黒毛和牛】2300YEN，好好味，小丸子一個人食咗半份，其實佢應該食到一份，不過我見有啲肉好生，唔敢比佢食﹗

十六穀米

睇下佢個『衰樣』就知佢的評分，個樣越衰代表越好味﹗我睇佢都好滿意今餐﹗

食白飯的女孩﹗我唔怪佢，都知佢唔食肉，其實應該同佢去食壽司既﹗

之後買返個 MISTER DONUT 比大頭妹補數﹗

經過百果園，仲買咗 pack 桃﹗1500YEN 2個好大個，不過唔係太甜，之後有一日係超市買的好甜，下次都係去返超市買﹗又平﹗只是 500YEN 就有 2個﹗

牛かつ: http://www.jfoods.co.jp/menu.html

2017年7月11日星期二

小丸子【KISS THE SMARTEST DNA 測試】

5月尾的時候，同小丸子做咗個 DNA測試【KISS THE SMARTEST 全面基本測試】，測試包括: 母乳智商反應﹑語言﹑音樂﹑數學﹑閱讀﹑學習天份﹑專注力﹑交際能力﹑高脂食物對於身體肥胖的測試和遺傳過敏性濕疹測試，總共 10項的天賦﹑性格﹑體質的測試﹗原本應該是 2個星期左右就可以拎報告，點知遇著 8號風球，之後又大頭妹考試，所以去到 6月尾先攞到報告啦﹗哈哈﹗真是等得我好心急，連我工人姐姐都問咗我幾次，佢話成日覺得妹妹好聰明，不過其實呢份報告就唔係睇 IQ的﹗

其實早係小丸子 3歲的時候就做過『學習型分析』，透過家長的問卷﹑再觀察小朋友的行為，睇下小朋友屬於邊種學習型，從而找出比較適合的學習模式 (視覺﹑聽覺﹑手動觸感)。之後上年 4歲時，又做過『皮紋分析』，有人話唔科學，好似去睇掌咁 ﹗今次 DNA測試，我視為『終極』測試啦﹗其實 DNA 測試係外國都好流行，最初主要用係醫學上，例如: 癌症﹑心血管遺傳病上，再慢慢用係測試天賦﹑性格上，所以可以話係絕對科學。

先講下流程，我事先已經問得好清楚，DNA測試係以口腔細胞作為化驗樣本，絕對唔洗抽血既，只需要用所提供的口腔棒，係口腔內來回擦拭打圈就可以。我揀咗係屋企進行抽樣，咁小朋友無咁緊張，又慳時間。

今次幫小丸子做抽樣的是黃博士，黃博士好有經驗，同小丸子傾下計，叫佢數下 123﹑唱下歌就成功抽於樣本。

完成測試後大約 2-3星期就可以攞報告，博士級的專家會講解返報告的每一個細項，之後仲會建議返點樣計畫一下小朋友的教育﹑興趣培養﹑醫療健康﹗

簡單講下小丸子份報告，報告話小丸子的母乳智商反應非常好，即是飲母乳對小丸子的智商有正面幫助，好彩我當年都餵咗小丸子 6個月，頭 3個月是全母乳，無加奶粉。另外，語言﹑數學﹑學習天份﹑交際能力都強，而我最擔心的專注力，都係正常的水平﹗有一個好好笑的，唯一一個『紅色』是『高脂食物對於身體肥胖的測試』，呵呵呵﹗即是食高脂食物會比一般人易肥，咁睇嚟我真是要好小心小丸子的飲食啦﹗

另外，好認同黃博士所講，做 DNA 測驗，只是比機會家長早點了解小朋友的特質，並不是話做完小朋友好有天份，咁唔洗理佢架啦，天才嘛﹗又或者是做完發現小朋友無咩天份，咁又唔洗理佢啦，無得救架啦﹗而是希望家長，可以好好利用測驗的結果，好好培養小朋友，例如小丸子語言天份好，可以細細個多啲接觸外語，又或者比較適合讀兩文三語的幼稚園/ 小學﹔數學天份好，可以上數學方面的興趣班，學得好啲，可能可以提高個人自信心﹔交際能力強，可以參加一啲制服團隊，多接觸人，提升人際關係﹗

如果大家有興趣知多啲，可以 click 入以下網址睇下﹗
Lifecode Kids:
Website: http://kids.lifecode.com.hk/
Facebook:

2017年7月4日星期二

二人世界打邊爐『叙亨軒』@20170627

2017年 6月 27日 (星期二)

哈哈哈﹗大家媽媽們有冇覺得小朋友考完試，做阿媽的仲開心過個小朋友，我就係其中一個﹗等大頭妹一考完試，我就放監啦﹗不停約朋友食飯﹑去剪頭髮﹑仲可以同阿旺二人世界﹗

今日我就去剪頭髮，每年呢個時間都會剪髮，因為 7月我生日，加上暑假會去旅行，要剪靚個頭去影多啲靚相﹗剪完髮已經 10點，原本想去天后的滾得盞打邊爐，但已經太夜了，岩醒起之前係附近一間打邊爐都唔錯，所以就係尖沙咀食啦﹗

上次嚟的時候應該係星期五，又或者是冬天，所以唔覺有呢個 promotion﹗細肥牛 $88，象拔蚌 $498﹗