傻夫婦暑假九州親子遊Day4「杉乃井酒店」@20190718

今年暑假都應該無得去旅行，寫返2019嘅旅行Blog，回味一下旅行的日子，其實呢間九州有名的親子酒店「杉乃井酒店」都好值得寫。不過睇完，大家又無得去😂。

今次訂的是4人家庭房，包2大2小自助早餐和晚餐，睇網上comments，其實佢哋嘅意大利餐廳不錯，可以加錢upgrade，但就返小朋友，所以最終都是揀自助餐！

先睇睇房間，一邊是和式，另一邊是洋式，最後晚上大頭小丸瞓和式，我和阿旺瞓洋式。












呢度最大賣點是親子！有溫泉游泳池！


睇下佢地幾開心？

晚上食自助晚餐🍕🍔🥗🥘🍣🍝🍱🎂🍨🍬。


我記得佢哋嘅牛扒唔錯！

有長腳蟹，不過好似係季節性。


Parma ham。


仲有得自己整綿花糖。


食完晚餐再去打保齡球！




仲有兒童game centre！小朋友真係玩到唔捨得走！

Athena便當：醉雞翼（附食譜）

2021年7月30日（星期五）

一連預備了5日的便當，不想重複，去到星期五，要認真想想煮什麼？！行超市的時候想想，星期一是芒果大蝦沙律、星期二是燒汁牛扒、星期三是柚子胡椒雞扒、星期四是香煎藕餅⋯⋯不如煮雞翼啦！因為我食之前不會再加熱，想想不如就煮醉雞翼啦！本來就是凍食！

是日便當：醉雞翼、紅蘿蔔沙律醬

煮醉雞翼其實好簡單，我今次用了2個不同的汁，一個是之前的整醉鮑魚的汁，另一個是參考蘇絲黃的食譜。

行aeon時見到好大隻的法國無激素雞翼，$25/9隻，買了2盒，共18隻！

我個人習慣花雕全部加熱去煮浴冰糖，另外都可以揮發酒精⋯⋯話說我唔飲得酒，之前煮醉鮑魚，食完2隻，竟然覺得自己全身發滾，我可以是世界上食醉鮑魚都醉的第一個人😆。


煮滾2-3L水，要蓋過全部材料，喜歡的過可以加入薑蔥，我忘記咗！蓋上蓋大火煮5分鐘，熄火焗10-20分鐘（其實雞翼浮起就是熟啦），我今次焗了20分鐘。


放入冰水冷卻，可以令雞皮脆身彈牙一點。


花雕冷卻備用，我今次煮了500ml，蒸發完大約仲有450ml到。


左邊是花雕加魚露，右邊是花雕加糟鹵，加了粒話梅去分別，老公話花雕加魚露香啲，不過可能是因為我加了沒煮過的花雕，所以酒味濃啲。


我仲未買樽，因為工人姐姐話買完樽雪櫃都無位放😅。我最後2邊分別加入花雕同糟鹵直至蓋過全部雞翼。


浸2小時就可以食，我浸了一晚啦！


真是超級好味！

傻夫婦暑假九州親子遊Day3「由布院 吾亦紅」@20190717

2019/2020年比較懶散，以前遊記blog未試過「爛尾」，今次拖足大半年，2021年都過了一半，都未寫完2019暑假的福岡之旅！希望盡量可以完成！

今次行程最期待就是今日，訂了傳統溫泉旅館「吾亦紅」，吾亦紅在由布院山腰，所以去到車站要再坐車，訂的時候可以訂埋車，是免費的。我地訂了3:30pm車，所以去到由布院有時間吃午餐，再周圍行一陣。

入到房2個小朋友都好高興！

印象中大頭小丸應該是第一次訓 tatami。

房間入面有3個私人溫泉，但大頭小丸好驚昆蟲，不停呱呱叫，浸一陣就走人，最後我和阿旺一人浸一個，好爽！大頭小丸就浸室內的一個。

Welcome drink and snack!


我們在由布院買了原味的B Speak。如果大家會坐由布之森，由布之森都有原味，所以應該買朱古力味試試。

浸過溫泉梳洗完，就出發去食晚餐啦！

好豐富的晚餐！


兒童餐真是好正，「吾亦紅」亦好好，我訂完之後send email去問可唔可以轉兒童餐，其實大頭妹已過小童的年紀，結果佢地台灣職員打長途電話比我問介唔介意轉到只放到3人tatami 的房，然後幫我安排了兩份兒童餐。不過去到的時候，只安排了一份兒童餐，晚餐趕唔切轉，有些材料已經預備好，早餐再幫我轉。








清晨！空氣真是好清新！




走之前仲有紀念品！

Athena便當：黑椒牛扒

2021年7月27日（星期二）

其實經常都會煮牛扒，原因好簡單⋯⋯快、靚、正！而且雪櫃經常有存貨。不過平時同大頭妹小丸子一齊食，就沒有放黑椒。自己帶便當就喜歡放什麼就什麼！

是日便當：黑椒牛扒、芽菜（受pepper lunch啟發)、XO醬炒秋葵、生紅蘿蔔


一塊大的美國肉眼扒，其實如果是冷便當，西冷油脂少一點會比較適合。


肉眼$99，芽菜$26，秋葵$14，仲有無入鏡的日本紅蘿蔔$10。全部是$149，除以2是$74.5，自己煮成本一點都不低，仲要我因為日日煮，日日去超市，日日買買埋埋好多其他嘢⋯⋯每日最少都$2-300，其實夠我食個omakase！😂😂😂


先煎牛扒至5成煮，切條再回鑊加入汁煮至全熟。


之後不用洗鑊，直接炒芽菜，加少少鹽和酒炒至軟身。


仍然無洗鑊，繼續炒埋秋葵，加入少少豉油，少少XO醬快炒！


登登！完成啦！


老公嘅！

其實我以前好少帶飯，因為我唔鍾意重複，昨晚食完今日又食一樣的，現在自己煮，每日lunch time都覺得好幸福！

Athena便當：柚子胡椒雞扒

2021年7月28日（星期三）

最近開始自己整便當🍱，剛剛開始幾日，不知道會維持幾耐⋯⋯會補返前幾日的便當，希望自己有恆心，無論是煮，或者是寫Blog。

點解會忽然間煮便當呢？當然是因為⋯⋯WFH期間肥咗幾磅啦！所以便當沒有飯，只有肉和菜！

看看今日餐單：柚子胡椒雞扒、西蘭花、車厘茄

早一晚切好、浸洗西蘭花


醃好雞扒，醃料好簡單，就是鹽、胡椒粉、柚子胡椒，柚子胡椒是日本居酒屋常見調味料，是九州特產，由柚子皮、青辣椒、鹽製成，有少少柚子的清香和青胡椒的微辣，配雞肉類好夾！


在分秒必爭的早上，我先煲水，再去洗手間、刷牙，水滾放少少鹽，加入西蘭花，再去洗面。


洗完面，倒起西蘭花，加入冷水浸西蘭花，開始煎雞扒。


先以大火煎雞皮的一邊，煎至金黃色，就可以轉細火煎另一邊。


我加了1瓶蓋的酒，蓋上蓋，以細火煮3分鐘，期間去化埋個妝。


煎好啦！


可以再加少少柚子胡椒，吃之後塗勻表面，真是超級好味道！


上次在HKTVMALL 見到有「華味鳥」的柚子胡椒就買了，其實一般日或超市都有其他牌子的。

後記：因為加了酒去煎，還蓋上蓋，今次煎出來真是好Juicy，平時柚子胡椒雞扒煎完出來會有點乾，因為沒有汁。