2015年5月22日 星期五

大頭妹第一堂鋼琴班

 2015年 5月12 日 (星期二)

其實由大頭妹 N班的時候,阿旺就已經提我,小朋友學 2個興趣班就好了﹗

之後我 "盡量" 都有配合,但大下大下,報下報下,依家大頭妹一星期上 5個興趣班 (偷笑),葉氏兒童音樂班﹑JOLLY KINGDOM﹑小童群益會畫畫﹑芭蕾舞,最新有鋼琴。哈哈,都未上足 7日,其實本來鋼琴是等 6月上完葉氏之後報,不過心急媽,最後都是等不到,大頭妹一到 5歲就報名了﹗

其實之後都會回復返 3-4樣,但 K3應該真是要加公文數了,最近個小一講座,另外又同幾個小一的媽咪傾開,小一數學考試 35分鐘要做 60條數 (TOTAL 8 PAGES),唔係個別名校,係間間都係咁﹗﹗﹗

HEHEH...又講咗唔知去邊﹗講返大頭妹學琴﹗

報名之前帶大頭妹參觀過附近 3間琴行,第 1間去 "青苗",學費最平,初級只是 $140/ 30分鐘,我地未有琴,所以要租琴室,青苗都好平,佢有一個學生 PACKAGE,只是 $100/月,逢星期一至星期四 4:00前可以用。不過地方好似舊舊地,而且門面細,如果工人姐姐帶埋小丸子去,等大頭妹上堂時有困難,坐的地方都無,但初級只上 30分鐘,到時返屋企又唔係,等又唔係﹗

之後去 "柏斯",比青苗行少一條馬路,門面又大,有好多鋼琴 DISPLAY,大頭妹小丸子都好鍾意,之後睇埋課室都OK,學費就是 3間之中最貴的,$150/ 30分鐘,租琴房都是有學生 PACKAGE,不過就是 $250/ 5小時,每次最少用半小時,即是 $25/ 30分鐘,另外佢有個特別地方是佢可以比家長一齊入去睇小朋友上堂 (另加 $30/堂),呢點我好 BUY,因為可以知道小朋友的進度,練習時可以跟得好少少,我細個都學到 2-3級之間,依家簡單嘅都跟得到﹗

最後一間是正正屋企樓下的一間,好處當然是方便啦﹗不過其實睇完柏斯,大頭妹都揀好咗,所以就無再去睇啦﹗

之前讀葉氏,其實都是想大頭妹打好基礎,之後學琴。不過媽媽我又懶,大頭妹睇 5線譜麻麻地 (因為葉氏有考試,所以好清楚進度,上次 5線譜個 PART 好低分﹗),我之前有試過同佢溫,不過我又唔係太識教,大人自己數 5線譜就好易,唔明點解小朋友數來數去都唔識,我唔想為佢的興趣班勞氣,亦都怕影響大頭妹的學習興趣,見佢合格升到班就算 (不過剛剛 UPPER 3個期真是考得好差...)﹗

結果,到今日上第一堂就出事啦 (依家先講到正題...我真是太長氣...)﹗老師有問下小朋友學音樂的 BACKGROUND,知道大頭妹未學過琴,不過上過葉氏,有學過拍子﹑5線譜。我有同老師講,大頭妹 5線譜比較弱,所以老師話佢第一堂就先教 C - G,即是右手 5隻手指的手指位先。結果發現大頭妹真是完全唔識睇 5線譜,其實我估佢唔係唔識睇,佢係無信心,例如老師問好簡單的問題,F 之後是什麼?﹗F之後當然是 G啦﹗大頭妹都唔答﹗

老師問問下大頭妹越答越細聲,終於我忍唔全企起身問 "吓﹗點解你唔識呀?"。大頭妹就開始好似想喊想喊咁﹗老師就轉移先講 "拍子"。拍子又真係無問題,1﹑2﹑3﹑4拍都拍到認到﹗之後再跳返去教 5線譜,同學手指位。最後老師出埋功課比大頭妹做就落堂啦﹗

事後我都有同老師講,唔知係我比太大壓力佢,定佢比太大壓力自己,佢一做唔識就會喊,平時做功課都係咁。之後返到屋企即刻溫 5線譜啦﹗睇過老師點教,我就照返老師的方法,結果唔洗 5分鐘就學識 C- G啦﹗但大頭妹已經話唔想學琴﹗﹗﹗其實我都估到﹗﹗﹗之後我同阿旺不停同佢傾,原來佢想老師教慢少少﹗應承咗佢會同老師講,佢就繼續開開心心練琴啦﹗

第 2堂之前的第一次正式練習 (HEHEH...平時係屋企只是用一個 $199 的電子琴練琴),已經可以自己彈到 MARY HAD A LITTLE LAMB (第一堂教的),佢話要彈比 "王姐姐" (其實是王老師) 聽﹗我部電話壞壞地,錄唔到,下次要錄返先得﹗

大家 like咗我地個 facebook page未呀?未就快啲 like啦﹗

4 則留言:

  1. 睇到你個伿價錢 好似同我十幾年前學個價錢差唔多 哈哈

    回覆刪除
    回覆
    1. 係?﹗我已經唔記得我以前學幾多錢...因為唔係我比...hahahah...

      刪除
  2. Hi,
    我當年都系好似大頭妹個年紀學琴,當初去學,覺得piano好得意. :) 頭個miss教我時好有耐牲,又吾催谷,我都幾like!! 後來,mama同我轉左好strict ,又超傳统的老師教 ,之後再轉都相差冇幾....變到我好怕練琴,一提練琴,猶如苦差,頭都痛..同再冇动力考演奏,纯考完8级,收工.

    近几年,心血來潮时,都會彈下,~~

    所以吾好令大頭妹似我~~~

    另外,我同大頭妹一樣都係金牛座,我地呢类人性格系外人眼中不是好明顯同對自己有要求,最重要好睇人地对我地的体發& 本身已冇咩自信心,that means,當我地做吾到某樣嘢时: 1) 自責 + 心情低落, 2)會系emotion 沉澱後,唸方法去improve; 所以當自身的 1) 出現時,如有其他人出现 责罵加比面色我地,我地会有 3) 害怕,失落,4) 更加自責,自信心去到負教 & 5) 有不被接納及被唾棄感.

    我细個experienced 不愉快的學琴及練琴生涯時,曾有个extreme 的唸法,有d小朋友都系咁,我大個後都要迫mama學琴,用返去d对我negative 的態度對佢.

    回覆刪除
    回覆
    1. 我都明白,所以其實我都有少少內疚,明明佢上第一堂之前係好開心,上完之後就話唔上...不過我見老師係教得快,但又唔係無愛心,都好有耐性,所以都比佢繼續上多一陣,再睇下大頭妹反應啦﹗

      刪除

Related Posts Plugin for WordPress, Blogger...