2017年11月18日 星期六

傻夫婦東京親子之旅 DAY 4 【淺草和服愛】


想當年我同阿旺 2人世界去大阪京都 HONEYMOON,我地都著過和服,之後仲話如果第時有小朋友都要帶佢地去著和服玩下﹗帶過 2個女去了幾次日本,今次第一次著和服,前 2年覺得年紀太細,我地又夏天去,怕佢地會覺得太熱唔舒服,一陣一著上身就話要除,就浪費晒﹗今次 2個女 ,1個 7歲 1個 5歲,覺得都係差不多時間,再大啲著就唔夠可愛啦﹗

今次我地去咗【淺草愛和服】,我地預約了 family package 是 12800YEN,即是 3200YEN/位,價錢就唔貴,所以評價都唔錯,而且有台灣店員,我去的時候仲有香港人店員﹗不過可能因為有上次京都的經驗,京都既和服好似真是靚啲,服務好啲,咁價錢都貴啲,我記得是 5000YEN/位到。

淺草愛和服就比較流水作業式,同一時間店舖其實是擠滿客人,起碼都有 2-3組客,每組都有 2-4人,雖然有 3層,第一層是登記的地方,第 2層是男士,第 3層就是女士/小朋友,所以 3/F 比較迫人。另外,小朋友可以揀的款式比較少,我只是想要粉紅色,110碼的都無,好彩小丸子生得大隻,最後日本師傅話佢要著 120碼,所以先有一套粉紅色,大頭妹就揀了深藍色,另外好似都係得返 1-2套 120碼的?﹗店員話因為前一日係假期,好多人租咗出去未還喎﹗佢預約的時候其實是可以揀埋和服,所以如果大家預約時有心水都真是最好留埋和服﹗

出門遇貴人,當我地去到雷門景點位,忽然有個望落好 professional 的大叔問我地係唔係要影相,實在太好啦,真是影得好靚﹗

每次去東京都會去雷門﹗今次其實唔係特意去雷門,不過和服店就是雷門附近,所以又再去啦﹗

有好多小攤檔,賣日本小食,天氣咁熱就當然要食刨冰﹗

小丸子一個人霸住嚟食﹗

基本上...小丸子去到邊都是食食食﹗


唔係食就係飲﹗佢大個有潛力做 food blogger﹗

又有人表現街頭賣藝﹗

天氣實在太熱,買多杯冰食﹗


2年前嚟都玩過,其實唔係玩既,是泵水的﹗


今次嚟唔算多人,上 2次嚟,一次是日本新年,一次是夏祭,超級多人﹗

沿路我基本上影唔到一幅佢冇食野既相?﹗

三定,10年前同阿旺嚟的時候食過,今日都想食,不過食小食都食飽﹗

行完雷門一圈,小丸子都叫累了,我地返去還和服了﹗







下次再去日本都未必會再著啦﹗小丸子行咗 1個圈,大約一個鐘,就已經想除,中間行咗 15分鐘就已經要同大頭妹換鞋﹗所以都提提大家,如果平時小朋友無著開人字拖,都係比返佢地著波鞋好啲﹗ 

大家 like 咗我地 Facebook page 未呀?﹗未就快啲 like 啦﹗

2 則留言:

  1. 你們一家人著和服好靚靚呀,著人字拖就整體d靚d,不過小朋友當然唔愛穿夾腳指拖,大人著得耐都唔舒服喇,難怪小朋友呢

    回覆刪除
  2. 問題係職員比咗對舒服啲軟底佢唔要,小丸子係都係靚啲木底呢﹗轉個頭腳痛,又問家姐可唔可以同佢交換﹗

    回覆刪除

Related Posts Plugin for WordPress, Blogger...