炆鮮鮑魚 (附食譜)

上次去北角買海鮮，食過返尋味，之後一個星期六 (已經是上上上星期六的事)，帶大頭妹參加學校的畢業禮的時候，又去買海鮮﹗不過睇畢業禮的時候太激動，喊了 2次，之後去洗手間洗面，眼紅紅帶住大頭妹去行街市，唔知有冇嚇親人﹗想去買螺頭煲湯，又岩岩無貨，可能個老闆諗...買唔到螺頭，唔洗喊呀？﹗哈哈哈﹗

今次同上一樣買了鮑魚和珍珠蜆，打電話返屋企，搖控工人姐姐去買牛肉片﹑金菇﹑菜，仲有煲湯的材料﹗之後再 whatsapp 二妹上嚟食飯﹗我覺得我真是好有師奶的天份﹗﹗﹗

大部份人覺得煮海鮮好難，其實炆鮮鮑魚唔難，最重要是洗得乾淨，同埋要有時間，要炆 1.5- 2小時，不過炆的時候，自己又唔洗企係度，最多間中望一望，睇下有冇乾水，所以我反而覺得煮金菇牛肉卷仲辛苦囉﹗

今次買 "正價" 鮑魚，$100/ 8隻， 上次 $50/6隻好細隻，今次的是中 size啦﹗

用來炆都不錯﹗買細的用來炒/ 蒸都可以，但一定唔可以炆，炆完會細隻咗，無肉食﹗

珍珠蜆，今次買 $40啦﹗

金菇肥牛卷，是三個餸之中最多功夫的﹗

蝦醬炒通菜

炆鮮鮑魚

材料: 鮮鮑魚 8隻/ 薑/ 蔥

調味料: 雞湯 400ml/ 豉油 100ml/ 清酒 100ml/ 麻油/ 三溫糖 (什麼糖都可以)
*唔知是不是麻油的原故，出來的味道好似 "出前一丁" 麻油味，不過放心，炆完 2粒鐘就鮑魚味架啦﹗

做法:
1. 先洗刷鮑魚，但唔洗去腸 (沙袋？﹗)，出水之去就好易清，新鮮的時候容易界手。

2. 水中放入薑蔥，將鮑魚出水 (凍水落鮑魚)，去腸，再清洗多一次。(出水的水係唔要架﹗唔好攞嚟炆鮑魚呀﹗)

3. 將調味料加入煲水混合，放入鮑魚炆 1.5 - 2小時 (又是凍水落)，視乎鮑魚大小。

4. 炆好後將鮑魚取出，炆鮑魚的汁加入少少生粉水煮至自己喜歡的杰度就可以了 (optional)。

仲有花膠智利鮑紅蘿蔔粟米淮山茨實蓮子湯，大頭妹同小丸子都飲咗一大碗呀﹗唔好睇我煮咗鮑魚又蜆，呢餐唔計個湯，其實都唔洗 $200﹗反而個湯就應該要 $100，因為淨係肉都買咗 $40﹗

大家 like咗我地個 facebook page未呀？未就快啲 like啦﹗多謝支持﹗

繁忙星期六 (附油鹽水蜆食譜)

星期六早上，要送大頭妹返興趣班，星期日到小丸子上 playgroup，放假都無得瞓晏啲，所以7月開始，將大頭妹的唱歌班調去星期二下午，等星期六可以 free返出嚟！點知睇返升班紙，都是升星期六早上嘅？原來老師搞錯咗，真是改了星期二，叫我接返大頭妹走！好彩住得近！

反正都出咗去，帶佢地去夢之島玩下﹗

上次去的時候，比小丸子見到有人淨返一局未玩，佢玩咗幾下，發現佢識玩。今次比佢同家姐一齊玩下﹗不出我所料...小丸子係玩得叻過大頭妹...大頭妹玩啲要用 "少少" 體力，同手眼協調，都無小丸子做得咁好...

睇下小丸子幾開心？﹗原來個 GAME是有風出的 (我從來未玩過，我細個都唔會去玩 GAME CENTRE，覺得浪費金錢)，所以玩到最後無風都未分勝負，就會好似我地上次咁可以自己大打啲推來推去啦﹗

之後去羅麥記食早餐，佢地早餐都 OK，不過少少貴﹗

我的沙嗲牛肉通粉

大頭妹小丸子的火腿通

阿旺的蕃茄肉碎米

下午 2:00去大頭妹學校的家長日，不過唔係派成績表，只是聽明年 K2的課程，同講少少小一升學﹗

之後因為係北角，我同阿旺去買埋餸先返屋企﹗

第一次買 "珍珠蜆"，呢度只是 $20，再加一包粉絲﹗問老闆點煮，佢話油鹽水煮好，我又試下，都是第一次煮﹗阿旺話好好味﹗﹗﹗不過 "埋怨" 我買得 $20，因為佢本身想買 $40，比我 "阻止" 咗﹗

鮑魚 $50/ 6隻，求祈陳皮蒸就算﹗

咸菜炒鮮魷是媽媽的拿手菜﹗鮮魷 $30，咸菜 $8。

最後都仲係驚阿旺唔夠肉，買多 $25腩仔﹗

仲買咗 1斤通菜，呢餐加埋，唔洗 $150﹗真係抵食﹗不過要去北角街市先得﹗去鰂魚涌街市/ 太古...啲野無咁平﹗

最後成碗留返比佢一個人食...唉...小吃多滋味呀﹗

油鹽水蜆 

材料:
珍珠蜆 1斤 (其實什麼蜆都可以)
粉絲 1包

做法:
1. 先把蜆洗淨，水中加入 2茶匙鹽，浸 3小時吐沙 (可放入雪櫃)
2. 煮蜆之前再換一次水，再沖洗一下
3. 在小鍋中放大約 1.5寸水 (一定唔洗浸過啲蜆)，加入少少鹽﹑胡椒﹑麻油﹑辣椒
4. 水滾後加入蜆，蓋上蓋煮 1分鐘
5. 開蓋繼續煮，見蜆一開殼就可以先拿出來 (呢個係我習慣的方法，可以確保唔會都得過熟)
6. 用淨返的水煮粉絲，可以加多少少水，自己試下味，睇下仲要唔要加多少少調味
7. 最後粉絲放底，再放蜆，將熱湯加入就ok啦﹗

大家 LIKE 咗我地的 FACEBOOK PAGE 未呀？﹗未就快啲 LIKE啦﹗THANK YOU!