請新工人姐姐 之 最後真相

寫得最後真相，聰明的你應該已經估到，我工人姐姐最後都無出現﹗﹗﹗到底佢有冇真是嚟過香港？﹗到依家都是一個迷﹗﹗﹗

成件事有好多 "疑點"﹗

1. 首先是我打去入境處 hotline 問，職員其實已經講咗工人姐姐如果 body check 有問題，係應該係醫院，唔會係入境處，如果係九龍灣，會係 "犯事" 的姐姐。

2.到我打去九龍灣入境處，佢話佢地無地方比人住，一般唔會留過夜，叫我自己打去問 agent，點聯絡個工人，我話因為之前全部都是聽 agent講，我其實唔係好信個 agent，佢叫我可以打去外傭組問，外傭組的回覆是個姐姐的 "工人visa" 未用？﹗即是工人可能是未入境/ 用咗旅客身份入境，我再問正常係唔係一入境，個visa就即時用咗，佢答我係﹗當我地問 agent 時，佢之後就話原來個工人真是用咗旅客身份入境，我覺得好不可思異，佢同佢 body check，睇醫生，再入醫院，都唔知佢人係用遊客 visa？﹗醫院應該收好貴喎？﹗佢話政府比？﹗遊客入院政府找數？﹗

3. 我打過去衛生署問，佢地話如果我工人係有 "迴蟲"，迴蟲唔係 "傳染病"，係唔洗同佢地通報﹗佢地叫我 send 個 email formally 問，不過我星期五 send 咗，今日都未覆﹗

4.阿旺有打過去律敦治問工人姐姐的住院紀錄，但由於工人姐姐已經出院，又因為私隱，佢地唔答得﹗

5. 由始至終，我地除咗一張未貼上 passport 的 visa，我地無見過其他 documents，例如: 入院証明﹑入境紀錄﹑驗身報告﹑機票...全部野 agent 都話係個工人姐姐度﹗連好簡單，之前佢話 dhl 個 visa 比工人姐姐，見佢 2日都未收，問佢攞個 dhl number，佢都比唔到我地。個工人係斷約既，問佢攞前僱主 reference letter 都一直無比。之間話佢比入境處扣留，問佢攞工人姐姐電話，佢又話工人電話卡無錢﹗總之樣樣都有野推﹗


ok...係時間講埋個結局，我地話我地最多等到星期一 (因為 agent 話佢星期二 12/1 去入境處辨簽證時，佢話入境處當時話應該是要觀察到星期五 22/1，咁如果星期五都見唔到人，我地都只可以等到星期一。結果個 agent 約阿旺星期一上灣仔入境處，9:00幾的時候問阿旺可唔可以改 12:00，話自己要睇醫生，阿旺話唔ok，最後 agent 話睇完醫生10:30到，佢見到阿旺只是同阿旺講...工人姐姐上星期五自己返咗菲律賓，仲問咗佢職員借咗 $500買機票﹗佢地最終都無見到入境處職員，即是我地所知的，全部都是 agent講，ok...呢刻講咩都唔重要，佢話佢會 "全數" refund，希望我地真是會收到錢啦下﹗

我覺得我完全料事如神，我上星期已經同阿旺講，星期一個agent會同佢講工人返咗菲律賓，佢唔會見到入境處職員。最鬼激氣係...阿旺之前仲要話我 "咄咄迫人"﹗女人就是咄咄迫人架啦﹗我地遇得壞男人多嘛﹗你唔會咄咄迫人係你好彩囉，從來未遇過一個要人咄咄迫人的人﹗佢話佢從未見過一個人講大話是無目的咁講到個大話穿！雖然...其實我都唔明，佢呃多我地 2個星期 (前後 3個星期有多)有咩作用，不過從來都有人係講大話當呼吸，未遇過只是你一直好彩﹗