請新工人姐姐 之 一波多折

唉﹗舊工人姐姐無啦啦走咗，原來都未算最黑，請新工人姐姐，一樣咁多波折，我覺得我可以出返本短篇小說。

11月9日  請新工人
先講講工人 background，菲律賓，34歲，有 2個小朋友，老公唔見咗人。之前是香港做咗 4年半同一個僱主，九龍塘豪宅，有自己房，有 food allowance，仲有多 $1000人工，即是 total $6000，已經做到第3張約，但話僱主忽然養狗，佢驚狗所以要辭職。其實差少少就攞到 long service 架喎？﹗仲有我地只是比最低工資，又無自己房，都肯做？﹗不過我無考究啦﹗

當時 agent 話預 12月21日到 (冬至)，聖誕節前可以上班。

12月21日  當然未到

12月23日  打去問 agent，agent 話係入境處追緊，話希望放假前批，咁有望假期可以到。

12月24日  入境處都是未批，agent話要等到 12月28日。

12月28日  入境處都是未批，agent話聽日應該ok。

12月29日
agent話入境處批咗，即日 DHL visa 過去比工人，希望 12月31日前收到，book咗 12月31日/ 1月1日/ 1月2日的機位，就如果1月1日上到機，2個囡假期完結前都叫到啦﹗可惜最後工人姐姐 1月4日先收到份 DHL，之後話無機位，要1月9日先有位，即日做 body check，有望 1月10日上班。

1月9日
工人姐姐班機 delay咗，做唔到 body check，1月10日又星期日又做唔到，最後要 1月11日先做 body check，1月12日會有 report，一切ok就可以上班。

1月12日
工人姐姐 body check report 有問題，佢有亞米巴迴蟲，要睇醫生，醫生話小問題，不過要通報衛生署，之後衛生署話第2日去再去 check，所以工人仍然未可以上班。

1月13日
工人姐姐去衛生署 check，話無問題，不過衛生署要佢入院，話要住 2日。

1月15日
話報告未出晒，無得出院，星期六﹑日冇報告/ 醫生，都應該無得出院，即是最快星期一。嘩？﹗我生大頭好都是住 4日，因為我凌晨生，要住到第4日，先夠 3日，否則 3日出得院。我生小丸子，有妊娠毒血，之後要 check 住血壓，先住咗 5日。依家唔知衛生署 check 咩要住 4日，唔係話床位好緊張？﹗

1月18日
以為工人出得院，原來話今日先出埋最後一份報告，所以要聽日先出得院﹗

1月19日
聽聞工人出咗院啦﹗agent 話去入境署整 working visa，但入境署話未收到衛生署的 approval document，所以唔批，等到晚上 10:00，agent 話佢都仲係入境處，阿旺留 message叫佢夜少少覆都無問題，結果都是無覆。

1月20日
一整日等消息。我打去入境處問，打去 hotline 留電話，到今日 (1月22) 都未回覆。agent的回覆是原來之前溝通問題，衛生署是要觀察個工人到星期五 (下？又要等多幾日？﹗)

1月21日
問 agent 攞姐姐入境處﹑入院 record，只是收到工人 visa 的 copy (但只是 agent 的 copy，是一張未貼上 passport 的 visa，可能係寄比工人前影的)，因為有晒 number，我又再打去入境處問，因為 agent 話工人已出院，係九龍灣入境處 (扣留)，我打去 hotline 問，hotline 話九龍灣係處理有問題的工人姐姐，有病的姐姐應該要係醫院， 叫我打去九龍灣問下有冇呢個人。

九龍灣話佢地個邊冇地方比人住，叫我問 agent 個工人係邊？﹗另有比咗外傭組電話我，叫我打去問，個答案好恐怖﹗﹗﹗

外傭組話工人姐姐仲未用個工人visa，但唔可以話比我知佢有冇入境，只是話工人visa 係未用，一般一入境就用咗架啦﹗但佢又補充一句，佢可以以旅客身份入境架，不過唔知佢點解釋之嘛﹗總之就唔可以話我知佢有冇入境啦﹗(咁係唔係 agent 呃我地呢？﹗個工人從來未嚟過香港？﹗玩咗我地 2個幾星期？﹗)

阿旺再打去九龍灣問，第一個職員話可以幫佢 check 下到底有冇呢個人，叫佢 10分鐘後再打去，10分鐘後打去冇人聽，lunch time後再打去，另一個職員話唔可以 check係私隱，阿旺問點先可以搵到個工人，佢仲叫阿旺報警。OH...咁點解 hotline 同第一個職員都話可以 check 呢？﹗政府部門...真是...不知所謂﹗﹗﹗

咁...其實個工人有冇入過境？﹗叫阿旺問清楚個 agent，個 agent 呢時又話 check到個工人真是用旅客身份入境，但唔知原因﹗到底是 agent 呃我地？﹗一或成件事真是咁離譜？﹗

待續...