201年7月15日（星期五）
最後一日啦！好唔捨得！買機票時傻傻地，諗住玩6日，無睇清楚原來走個日是星期五，早知玩多日星期六先走，又唔洗請多一日假，都是比多一日酒店之嘛。九州好大，地方分得好散，其實好多地方都未去到，好似由布院﹑大分。今次去完我同阿旺都好鍾意福岡，希望我地好快會再去過，不過其實日本好多地方都未去過，應該會去埋北海道﹑沖繩先。
一朝早大頭妹食個大蘋果做早餐﹗
小丸子就飲朱古力奶﹗
今日，媽媽我就最後衝刺，10:00 就出門去買完最後一轉，其實都是落酒店樓下，對面個啲商場我都未行﹗買完就上房匯合佢地，pack 好行李就 check out，再係附近行下，打算之後再去麵包超人博物館，點知 2個囡，行百貨公司的玩具部，都行到唔肯走，話唔去麵包超人博物館喎？﹗哈哈﹗﹗仲好﹗﹗我又多少少 shopping time，次次親子遊都唔夠 shopping time。
11:00 check out啦﹗有一樣要讚下酒店，我地去豪斯登堡時 check out咗，返嚟的時候再 check in，佢地已經將我地行李送咗入房，仲安排咗一間係走廊前少少位置的房比我地﹗今次住得好開心，下次應該都會再住返呢間﹗
無去麵包超人博物館，所以無plan午餐，本來打算係館內餐廳食，最後就近近地係酒店樓下【星乃咖啡店】食 lunch，每日經過都覺得好吸引，尤其是佢地的 hotcake﹗
小丸子叫我影佢！
日本的兒童餐，好多都送玩具。
個兒童餐好靚啦！個蛋包飯應該好正，我見大頭妹都食好多。
我的hotcake，真是好正！又是可以做到同 display 既一樣﹗
我叫阿旺點的，其實唔知係咩，上枱先知是梳呼理焗飯，阿旺話太滯，普普通通。
其實酒店個 location 都真是幾方便﹗附近已經有 5-6個大商場: 大丸﹑三越﹑PARCO，仲月BIG CAMERA﹗
15:30 出發去機場啦﹗天神去機場坐的士大約是 2300-2500yen，上網唔多見人講下福岡的機場，其實都是想睇下有冇得最後 shopping，我可以話比大家知，係無既，不過手信類都有，同埋有一間 bao bao專門店。
福岡的機場好細，我眼見就得 3間餐廳，見仲有時間，是但揀咗一間入去食，因為我淨係買咗 2個飛機餐比 2個囡，無買大人個份。估唔到去到日本，真是去到機場是但一間都好味﹗
天婦羅冷麵，天婦羅熱辣辣，個冷麵亦出奇好味﹗
個壽司 set 亦唔差，我記得唔貴架，應該都是 1000幾 yen。
入閘後的 duty free 會大間啲同多啲選擇，又是全國出名的手信都買到，好似 Tokyo Banana﹑白之戀人﹑薯條 3兄弟﹑Royce﹑等等，仲有福岡名物明太子﹗未入閘前的幾間就會少啲選擇，所以可以早少少入閘再慢慢 SHOP﹗
依家仲興唔興 BAO BAO？﹗我記得上年我係成田機場見到，間鋪係吉既﹗福岡呢間都有幾多貨﹗
貶下眼 6日5夜的行程就完啦﹗唔知大家有冇一個感覺，去4日就覺得去 5日就好，去5日就覺得去 6日就好，今次去 6日啦...我就諗如果去 7日就好...哈哈哈...其實我 PLAN 行程應該 PLAN 少一日，成日覺得好急，未去晒要去的地方﹗好啦﹗如果出年仲有得去旅行，就睇下會唔會去 7日，不過當然都要睇下去邊度﹗
傻夫婦九州親子之旅行程一覽:
傻夫婦九州親子之旅行程一覽:
大家LIKE咗我地個 FACEBOOK PAGE 未呀？未就快啲 LIKE 啦﹗
沒有留言:
張貼留言