傻夫婦一家四口生活日誌: 傻夫婦九州親子之旅 DAY 3 【豪斯登堡 WATERMARK HOTEL/ 花之家(午 + 晚餐)】

2016年8月8日星期一

傻夫婦九州親子之旅 DAY 3 【豪斯登堡 WATERMARK HOTEL/ 花之家(午 + 晚餐)】

之前篇 DAY 3都講過下，呢篇再主力講酒店，同其中一間我覺得值得推介的餐廳﹗

其實豪斯登堡園內/ 附近酒店都幾貴，不過帶住 2個小朋友，即日來回我真是怕辛苦，而且樂園 10:00PM 關門，尾班車是 9:00PM，尾班車仲要係『佐世保』開出，即是 8:00 到就要走，仲要計埋晚飯時間，唔想玩到趕頭趕命，都是住一晚。

我訂了 WATERMARK HOTEL 最平的大床房，一晚大約 $1300，間房大過天神個間，裝修有點舊，不過都整潔既。WATERMARK HOTEL已經算是園區較平的選擇，我見旅行社通常住樂園大門口間 OKURA HOTEL，價錢貴少少，不過好似靚好多，大家訂的時間可以比較下價錢啦﹗

小朋友去到酒店的指定動作...跳床﹗

日本酒店的浴室來講...算大啦﹗

用品都好齊全。

酒店見有小朋友入住，會另外再提供小童拖鞋﹑毛巾﹑牙刷。

我地住 6/F 最高，窗外望返豪斯登堡園內。另一邊是海景房，價錢當然又貴啲啦﹗但我預咗玩到 10:00 先返房，第 2朝起身就走，所以都唔會考慮比多啲錢去買個 VIEW。

【花之家】
其實園內都有好多大大小小的餐廳，有貴有平，我地今次揀呢間算中價，酒店內的餐廳會比較貴，園內都有部份食輕食的餐廳，所以其實都算 "豐儉由人"﹗

一早已經計畫嚟呢度食SUKIYAKI晚餐，所以就問阿旺，午餐食返同一間，定試下其他 (不過聽好多個朋友都是中伏多)，所以最終就午餐都食同一間啦﹗

我同大頭妹小丸子3個人點了2個壽司+天婦羅烏東SET，個烏東同天婦羅都好好味，壽司就一般般，可能因為我地要就大頭小丸，我叫咗 "no wasabi"，所以好少爭少少，同埋飯實咗少少，不過啲飯大部份都比大頭妹同小丸子食咗，大頭妹好鍾意食壽司飯﹗

魚生都新鮮，不過可能因為我地前一晚係福岡食既壽司實在太好味，所以覺得呢度既普通。

個熱烏東好好味囉﹗個湯底好正﹗最後小丸子差不多食晒，即是佢同大頭妹食一個set，其實呢度有 2款好靚的兒童set，不過佢地都唔鍾意。

熱辣辣好好味﹗

我既冷烏東無熱的好味﹗

阿旺的豬扒藎飯真是不得了，佢話好好味﹗

每一粒飯都被蛋包圍﹗

阿旺另外加點了蒸多比大頭小丸，佢地都愛日本蒸蛋﹗

鏡頭一轉去到晚餐啦﹗

呢個小朋友...好鍾意食冰﹗

阿旺今個 trip餐餐都飲啤酒，佢話日本啤酒好飲啲喎﹗

其實都有好幾款 SUKIYAKI，我地點最基本的都有 3款牛揀，由最平的國產牛 2600YEN，到伊萬里和牛 3200YEN，到長崎和牛 3700YEN。因為想試下唔同的，所以我點了伊萬里和牛，點了長崎和牛給阿旺，後來就後悔，只是差 500YEN，但阿旺的長崎和牛好味好多，仲大塊啲﹗之後先記得...豪斯登堡係位於長崎的﹗

我的伊萬里和牛。