2009年5月7日 星期四

HONEYMOON 之旅 DAY 3 - 祗園﹑錦市場﹑鴨川 (PART 2)

2009年4月26日 星期日
DAY 3: 心齋橋 -> 京都 -> 清水寺 -> 祗園 -> 鴨川 -> 心齋橋
行完清水寺就向市內出發啦...第一站是祗園,首先要食個 tea 先,食 tea 之前比我老公見到佢最鍾意的糯米丸丸,又話要食...
其實一轉彎就已經是 "壹錢洋食"啦... 不過佢食得落就由得佢啦
好好味...不過又食唔出有啲咩...淨係知好多蔥...
牆上有好多 "有味" 的繪馬,有時真是唔明白啲日本人...普普通通的食店...又有小朋友食客都可以放呢啲出來?
之後就再去錦市場...又係食...食咗海鮮燒烤串...麻麻地
之前諗住行咗黑門市場就唔行錦市場的啦...不過原來又完全唔係嗰回事,賣的野好唔同,呢度反而有啲手信野買...我覺得多野睇過黑門市場
之前睇其他 blog 見人推介呢間食燒蠔的...我當然唔會錯過啦﹗其實我唔食的...係我老公鍾意食...真係坐滿晒人
150yen 一隻燒蠔真是好抵食...老公叫咗兩隻
我都叫咗帶子 (700YEN),好大隻的...
之後回程見到頭先排長龍的豆品店而家冇咩人...咁就睇下有`咩食啦...
原來係賣豆漿軟雪糕 & 豆腐 DONUT,我又買嚟食...我見啲人用個 DONUT點個軟雪糕咁食的...我又試下...又真係幾好味喎
差唔多要還和服啦...返去之前去埋八坂神社...老公見到數個著和服的女仔...終於都忍唔住走過去問人可唔可以 "TAKE A PICTURE" 啦)...當然冇問題啦...佢地好 NICE 仲要埋我過去影...不過我怕羞... (之前見到個鬼妹著和服著得好有味道,佢已經好想問人可唔可以影的啦...我諗佢想影合照因為個鬼妹好靚)
還之前我老公話影下完套和服...我話係喎...我都未影個背包...影完呢張之後我老公仲要話佢都係影我背面有信心啲...比佢激死
還完和服呢...我地就去花見小路...真係比我地見到 2個舞妓...不過佢地行得好快,同埋之前聽人話係唔比影的...所以都冇勉強...
行完就去食晚飯啦...我地去京都的時間真係唔係好岩...過咗 4月頭又冇櫻花,又未到 5月...去到鴨川又唔可以坐出去...
我地揀咗呢間炭火燒烤...係自己燒的﹗
真係一舊舊炭的﹗好鬼熱...
我地叫咗個肉拼盤,一條一日干 (好似話係日本的咸魚...不過唔知係唔係我地燒得唔夠耐...唔係咁好食)個牛舌好好味...我係第一次食牛舌...原來真係咁好味
食飽就返酒店...回程我地竟然冇坐 JR...搞到我影唔到 JR站附近個塔...
p.s. 差啲唔記得咗...最後我想多謝我老公陪我癲,著住套和服係京都行足一日...其實著和服都幾累下...係 honeymoon 著咗啲平時冇機會著的衫...令我諗返起結婚著婚紗...真係好開心架﹗

沒有留言:

張貼留言

Related Posts Plugin for WordPress, Blogger...