大頭妹面試大作戰 (1)

上上星期六，帶大頭妹去見幼兒園的預備班﹗第一次面試，其實我都幾緊張，大頭妹當然不知道發生什麼事，阿旺爸爸就唔洗講，佢個人一向 “天跌落嚟當被冚” 。面試的時間是 11:30，我地 11:00就到了北角，快快手手食個早餐，一去到幼稚園的門口，嘩，已經有一條長長的人龍﹗個心又開始緊張啦﹗

因為是小組面試，好快我地就可以入去啦﹗入到去再分唔同的班房面試 (一次大約 10-12人)，一個家長負責同小朋友一齊面試，另一個就要去聽講座﹗我同大頭妹去面試，阿旺就聽講座。入到課室分2行坐，小朋友坐前面，家長坐後面，一坐底我就同大頭妹講 “SIT DOWN PROPERLY”，點知…之後佢真是郁都唔郁﹗

面試內容其實都是玩下遊戲唱下歌，再睇下小朋友的反應﹗有大約8個老師一齊見﹗一開始就問 EYES， NOSE，EARS，MOUTH，我不知幾開心，開正大頭妹個範﹗點知佢竟然只是做NOSE同MOUTH，平時佢係屋企會一邊做一邊講，佢識講晒架﹗其中一個外籍老師行過嚟的時候佢都有做，老師都有讚佢GOOD GIRL﹗

之後就唱 HEAD & SHOULDERS﹗我又勁開心，日日都唱3-5-7次架啦﹗點知學校唱舊版 (慢版)，大頭妹聽開新版，佢做完第一次之後就發現有唔同啦，第2次就唔做﹗之後主任老師行過嚟的時候問 TOES，大頭妹就指住自己的腳講 TOES，主任老師讚大頭妹叻叻﹗

第3樣是問生果同講故事，問小朋友鍾意食蘋果﹑橙﹑香蕉的就舉手(英文問)，大頭妹一聽到 HANDS UP就舉手，仲舉晒 2隻﹗全班得佢一個舉手咋﹗

最後就一齊唱歌唱 IF YOU ARE HAPPY，又是成日聽的，大頭妹即時拍手，之後要STEPS，不過坐係度STEPS唔到，我就叫佢企起身，佢就一邊拍手一邊STEPS，唱完全部人一齊拍手，大頭妹可能以為啲人讚佢，仲好大聲咁講 “好野﹗”， 啲家長同老師都笑咗出嚟﹗走的時候老師仲叫大頭妹 KEEP DANCING﹗不過最後老師同大頭妹SHAKE HAND，大頭妹竟然縮手﹗﹗﹗天呀﹗平時出街見到其他小朋友就衝埋去同人SHAKE HAND，仲大大聲講SHAKE，通常...都會嚇走人，老師同你SHAKE HAND，你竟然縮手﹗

面試中段，老師會行去家長身邊問一啲日常生活的事，例如平時邊個照顧小朋友，爸爸媽媽花幾多時間照顧小朋友，飲食&睡眠習慣…因為我生了2大粒痱滋 (1粒仲要生在舌頭上)，本來想叫阿旺同大頭妹去面試，但我又唔放心阿旺，最後都是出門口的時候，飲了一大杯冰水，痺一痺2粒痱滋，等我可以講到野﹗好彩我自己入去，岩岩同我地面試的是一位外籍老師﹗阿旺都一定識答，我講就會講多少少囉﹗

面試結果下回分解﹗