2014年6月10日 星期二

正視產前/後抑鬱

最近睇到一單令人好唔開心的新聞,睇完之後係 office都忍唔住爆喊,仲咁岩約咗個客 (好日都唔洗見客),我都係第一次咁失禮,流住 2行鼻涕見客,嚇到個客我問佢咩,佢都答我 yes ok,之後怱怱咁走咗﹗


深水埗昨晚發生駭人聽聞的家庭慘劇,榮昌邨榮俊樓一名37歲的母親疑失常用菜刀斬死一歲半的親女,警方列作謀殺案處理。警方當時在單位廚房發現該女嬰倒臥地上,已無呼吸,身上有十多處刀傷,地下一大片血跡。(全文: http://hk.on.cc/hk/bkn/cnt/news/20140605/bkn-20140605140926890-0605_00822_001.html)


老實講自己都有 2個小朋友,真係完全明白做媽媽有幾大壓力,其實陀小丸子 (第 2胎) 的時候係有少少產前抑鬱,自己當時唔多覺,但係就會做事提唔起勁,咩都睇唔順眼,可能平時都係咁做又無野,但個時就會去鬧人。最後連平時好好脾氣的阿旺都比我攪到發脾氣鬧返我轉頭,自己開始諗,係唔係有問題呢?﹗

我當時同自己講,如果再控制唔到自己情緒,就去睇醫生 (岩岩隔離 office個醫生就係睇情緒病嘅)。之後每次我想發脾氣的時候,就會問自己,如果自己唔係大肚,唔關 BB事,我會唔會都覺得件事有問題呢?﹗會唔會有唔同睇法呢?﹗慢慢慢慢情況就好起嚟﹗小丸子出世之後,都完全無問題﹗仲好開心﹗

其實當時全部都係一啲小問題,例如發生過咩事呢?

事件一,我陀住小丸子 (應該都 5個月以上),唔記得自己去超級市場/ 中環買 2條尿片返屋企比大頭妹用,好似仲買咗啲生果,結果超級重,一路行就一路好忟,點解老公唔幫手 (我仲記得佢出咗去同同事食飯,個排好多飯食)。事後 post上 facebook,有人問點解唔叫工人去 (因為工人唔會睇有冇 discount,又因為大頭妹當時用 merries,一返貨就比人買晒,要成日自己留意住先買到)。又有人話阿旺睇佢唔出唔幫手?﹗結果阿旺當然唔開心啦﹗佢話佢覺得自己好顧家,我只可以話,男人同女人對 "顧家" 的定義好唔同,可能男人之中佢已經好顧家,不過同我比,就無得比囉﹗不過自始我就無係 facebook post 呢類型嘅 topic,以為呻完就無事,但其實呻完解決唔到問題,問題仲可能大咗。

事件二, 我唔記得交啲水電煤,比阿旺話我做咩咩都唔記得,即刻觸動到我神經。自搬出嚟住開始,一直都係我交水電煤 (用聯名戶口的錢),大肚又要照顧大頭妹,佢幫下手都唔得?﹗佢話完我我叫佢自己做返,結果佢連 ebanking 的 password 都唔知,即時比我鬧爆,咁多年我做晒又做得好好,唔代表我大肚時都 manage到﹗不過如事者,依家都仍然係我負責﹗不過講返轉頭,其實個經濟大權係我手,佢每個月出糧就轉錢去聯名戶口,錢銀都係我處理,佢從來都唔著緊錢﹗

其實我好早之前都講過,我係一個 negative人,無咩朋友,開 blog就係想記底開心的事,等自己得閒睇返都開心一下... 寫 blog 係我一個減壓的方法,希望大家都搵到自己嘅減壓方法,開心生活﹗




7 則留言:

  1. 依家做人父母真係好多野要兼顧,做”香港人”父母更要面对教育、爭位問題!
    大家一起加油!

    回覆刪除
    回覆
    1. 係呀﹗大頭妹今年升 k2,出年都要報小學了﹗

      刪除
  2. Understand your stitutation. I had same situtation ten years before. Add oil!

    回覆刪除
  3. 完全明白! 而家無事就好啦!有時只嘆男女思維方法唔同,所以好多時都唔了解女性嬲咩!

    回覆刪除

Related Posts Plugin for WordPress, Blogger...