一家4口遊澳門 2012 - 計畫篇

新年大家會不會出外旅遊呀？﹗我地一家會去澳門呀﹗好開心﹗本來以為到細B出世後6個月之內 (即是一年後)，都無機會出去玩，其實之前仲想襯大頭妹2歲之前有平機票坐多一次飛機架﹗想去北海道"浸溫泉"﹗不過因為我再大肚就"泡湯"啦﹗
今次去澳門即日來回，新年的酒店太貴啦﹗而且我想訂的時候都爆晒﹗﹗﹗$2000-$3000一晚都話爆就爆，澳門的旅遊業真是好強勁﹗可能好多人想去"發新年財"﹗發新年財就唔岩我，我地會去睇水舞間﹗"水為財" 好意頭吖嘛﹗上年11月的時候，媽咪去過，睇完話好好睇，大力推介﹗連一向慳吝的媽咪都覺得值得睇(平時幾十蚊戲飛都唔捨得)，我當然唔會執書啦﹗

一 直都只是知道水舞間是一個以水為題的大型舞台表現，上網睇下資料先知原來當中都有一個故事，好似白雪公主故事，入面的公主有個惡毒的後母，不同的是當中後 母仲有一個王子，佢地霸佔咗公主的國家，仲囚禁了公主，之後有一位英勇的浪人，對公主一見鍾情，展開呈救公主﹑對抗後母的旅程﹗而飾演公主的仲要是來自我 地"香港的"芭蕾舞蹈員梁菲小姐﹗

難得去澳門睇水舞間，揀了A區﹗不過其實ABC區，各自各精彩﹗


個舞台會係水底升出嚟？﹗

因為我太想帶埋大頭妹去，但 6歲以下的小朋友不能入場，所以我叫埋大頭姨姨一齊去﹗EHEHEH…好聽啲講就是當慰勞大頭姨姨成日幫手照顧大頭妹，難聽啲講就是"搵笨"，等我同阿旺去睇水舞間的時候，有人幫我照顧大頭妹﹗ 不過我已經幫佢諗好﹗新濠天地的 HARD ROCK酒店2樓，入面有個童夢天地，佢可以同大頭妹入去玩﹗85分鐘好快過啦﹗
童夢天地是澳門最大的兒童設施，85分鐘...我怕唔夠大頭妹玩呀﹗

HEHEHEH…暫時的行程如下，大家都比下意見吖﹗

10:00 出發

11:00 到達澳門氹仔

12:00 午餐@新濠天地-喜迎樓

13:30 大三巴

15:30 下午荼@官也街

17:00 水舞間

19:00 晚餐@水蟹粥/ 葡國菜
22:00 回程

HEHEHE...最後講個秘密比大家知﹗我咁大個囡都未去過澳門架 ﹗本來我覺得沒有什麼大不了，不過不知道為什麼每一次我同身邊的朋友講的時候，他們都很大反應，好像聽到什麼難以置信的事 ﹗我成日話等有車去得到先去啦﹗我怕暈船浪嘛 ﹗