21週，結構性超聲波﹗(附蘿蔔糕2012更新版食譜)

一口氣出返2個關於產檢的BLOG，希望唔會悶親大家﹗

2012年1月3日 (星期二)

今日去瑪麗醫院做結構性超聲波﹗又是 9:00AM，點解次次都要約這麼早﹗﹗﹗噢﹗不用錢嘛﹗出去私家做一次好似要 $1800，所以不要投訴啦﹗今次仲不需要等太耐，9:45AM已經到我啦﹗

上 次是一個實習醫生，今次是一個 "年青有為" 的醫生替我做檢查﹗原來實習醫生有實習醫生的好處，因為佢自己都未識，有另一個SENIOR一邊教，我又可以一邊聽﹗今次個醫生完全同我零交流﹗﹗﹗我只 是聽到佢話 "哦﹗BB合埋手仔，睇唔到手指，不過應該齊架啦﹗"，上次個實習起碼都真是一隻一隻數吖﹗可能佢見我露出一個懷疑的眼神，之後就再沒有自言自語啦﹗最後 醫生話一切應該正常，BB的SIZE是中間 50%。

做完檢查見時候仲早，就去CANTEEN食個早餐﹗上一次去的時候就是我生大頭妹的 時候，我一邊陣痛一邊食，好有 "感覺" 架﹗真是一世難忘﹗食完早餐阿旺就提早返工，我就自己返屋企接大頭妹放PLAYGROUP，之前SUNNY GARDEN的PLAYGROUP同幼稚園撞時間，所以改了星期二上，今日是最後一堂﹗我上到去就見佢自己一支箭跑出嚟﹗真是大膽呀﹗﹗﹗之後聽奶奶講， 佢返PLAYGROUP的時候又是自己一支箭跑出去，點知有裝修的電鑽聲，嚇到佢拍拍心口話 "驚驚"﹗

開始一星期一次魚湯啦﹗為餵媽媽奶做預備﹗魚湯真是有較架﹗


題外話...噚晚食咗星期六﹑日整的芋頭糕同蘿白糕，唔是我賣花讚花香，真是好好味﹗阿旺話蘿蔔糕好好味﹗我就鍾意食芋頭糕﹗不過都覺得自己整的蘿蔔糕好好味﹗

今年整蘿蔔糕落少咗 1/2茶匙鹽，1/6份量的蘿蔔切絲﹗


由於今年改了少少材料，更新返個食譜﹗

材料: 紅蔥頭 三粒 (爆香油鑊用)/ 冬菇 5隻 (浸軟，切粒)/ 瑤柱仔 半碗 (浸軟，撕絲)/ 臘腸 4條 (用熱水沖沖去衣，切粒)/ 蝦米 4湯匙 (浸軟，切粒)/ 蘿蔔 三斤(刨絲，連水備用)/ 粘米粉 半斤
*因為我唔食臘肉，所以用4條臘腸，否則可用 2條臘腸加1條臘肉﹗

調味料: 鹽 3.5茶匙/ 糖 2茶匙/ 胡椒粉 少少/ 麻油 少少

做法不變﹗請參考: http://blog.yahoo.com/athena_joe/articles/10216