BOXING DAY大頭契媽同ANNIE姐姐上嚟探大頭妹同小丸子﹗HEHEHEH...我成日都好 "婉轉" 咁叫啲朋友上嚟探下我2個囡，其實是想佢地做我的白老鼠，等我可以煮下野食﹗我好鍾意煮到一枱都係食物的感覺，唔知點解會好開心﹗雖然我老公成日都話我煮 得孤寒，不過我覺得係佢眼闊肚窄啫﹗我見次次都有少少食物剩，而且我地身處香港，日日都有好野食，我成日覺得PARTY唔一定要食得好飽，差少少好多剩多 多食物吖﹗我好怕浪費食物﹗今次煮咗6餸一湯，6個人加工人姐姐，一人一個餸，阿旺話終於夠飽啦﹗
下晝去北角買海鮮，其實一啲都唔平，不 過我好少煮海鮮，我個價錢仲係停留係2年前，以前我蒸鮑魚大約 $10隻 (已經OK大，有 $6-7隻細的)，依家原來已經要 $15，大約就係以前 $7隻的SIZE，即係升咗一陪，同樓價有得比﹗$170/ 2隻花蟹，真係好少煮蟹，所以唔知價﹗$100/ 8隻帶子，買完之後忽然記得以前灣仔買的 $20-30一份5隻，好彩食完發現有分別，今次的鮮甜好多﹗
第一次煮粉絲蟹煲，好好味﹗阿旺話有街食的水準﹗HEHEHEH...沾沾自喜ING...
炆咗2粒鐘，好好味...媽咪話咸咗少少，我係咸人，覺得好好味﹗下次都係唔好咁慳，買大隻啲﹗
HEHEHEH...好貪心，落咗勁多粉絲﹗多到都見唔到啲帶子﹗
ENCORE燒雞，今次係JUSCO買新雞本地雞，好似 $122，都幾好味，又OK大隻﹗
我唔明點解阿旺會反轉隻雞上碟囉﹗
唔係呢邊先係正面咩？﹗
係GREAT買的老虎蝦，$108/ 10隻...HEHEH...係GREAT買又唔覺得貴...人就係咁衰﹗不過好似唔夠CITY SUPER的好味﹗
當然唔少得菜啦﹗
最後有雪梨無花果淮山次實杞子圓肉鱷魚肉瘦肉湯
得閒真係要煮下野食，我發覺煮野食真係可以減壓﹗HEHEHE...唔知係唔係遺傳，大頭妹都好鍾意煮野食，今次客人食的JELLY，就係大頭妹整架啦﹗同佢整過芒果布丁同JELLY之後，成日都話要整布丁﹗
沒有留言:
張貼留言