大頭妹的童言童語

 

阿旺一向好惜大頭妹，不過大頭妹又真是好抵惜，最近 (可能都唔係最近)...仲取代埋我，做阿旺背後的女人...以下是大頭妹同爸爸的對話:

大: 爸爸，呢啲係咩嚟架？

旺: 乖女，呢啲係爸爸要做的project。

大 (看一看爸爸的功課然後問): 你識唔識呀？

旺 (無奈地) 答: 我唔識呀，今次真係唔識做。

大: 唔識唔緊要！唔識就去學，學識就返嚟教我啦！

大 (再看一看爸爸的巧課: 你寫得好好啊！(HEHEHE...其實佢識鬼睇咩﹗)
旺 (眼泛淚光): 爸爸知道啦，爸爸一定要學識佢﹗之後返嚟教妳，為咗妳我一定做得到！

阿旺話佢當時真的想喊出嚟﹗HEHEHEH...真是超級眼淺的爸爸...之後佢其實寫咗篇千字文 "表揚" 大頭妹...不過比我 CUT 成以上的對話﹗結果，阿旺就日日好勤力做功課...依家真是世界變...唔係爸爸叫個囡做好啲功課，竟然是個囡叫爸爸做好啲功課...

新年時我買了一部新的多士爐，有一朝預備早餐比大頭妹同小丸子，由於早上都是超趕的關係，我一邊搽 uv cream，一邊拿牛油比大頭妹小丸子自己搽麵包。

大頭妹 (望望我又望望盒牛油): 下？﹗搽係塊面度？﹗

hhahahhaah...我當時真是笑都收唔到聲，下次都是早少少起身，唔好成日都咁趕...



有一日坐地鐵，我見到一個伯伯上車，站著近車的位置沒有坐位，我就叫大頭妹讓坐，大頭妹行過去叫伯伯過來坐啦﹗但原來伯伯下一個站就落車，所以佢話唔坐啦﹗之後大頭妹行返埋位問我:
大: 點解要讓坐比伯伯呀？
我: 因為伯伯老啦﹗老人家坐地鐵無位坐，如果跌親會好麻煩﹗(我講完已經估到大頭妹會問我咩...我成日同佢講...我老啦﹗唔好激我，唔係我好快死)
大: 伯伯好老，咁佢係唔係.... (我掩著大頭妹的口)
我: 唔會唔會，伯伯唔會死架﹗
大 (一臉疑惑) : 點解伯伯老就唔會死，你老就會死呀？﹗
我: ...唔可以話人地 "死" 呀？﹗咁係好無禮貌架﹗
大: 點解話人死係無禮貌呀？﹗
我: 因為大部份人都唔想死，好怕死嘛﹗
大: 點解好怕死呀？﹗
我: 死咗就無爸爸媽媽架啦﹗無得返屋企架﹗

結果...因為唔想大頭妹講呢個話題，唔比佢講，反而令到個話題沒完沒了...我要投降了...以後都係唔好同小朋友亂講野...



又有一日，又是坐地鐵，我自己一個帶佢 2個上芭蕾舞，所以帶咗 bb車，小丸子唔知做咩係都要伸隻腳出去，好似坐學行車咁自己行，因為要入車箱，我怕會碌到腳 (前一日佢坐bb車時瞓咗，隻腳跌咗出去，已經試過碌到腳)，講咗幾次小丸子都唔理我，我話再伸就要打腳，佢仲即刻伸隻腳落地...結果我當然打咗佢腳仔一下，小丸子大喊﹗之後上到車箱:

大: 你睇﹗你整喊妹妹啦﹗
我: 我同佢講咗架啦喎﹗佢再伸隻腳出去，我就打腳﹗
大: 我地唔可以打人架﹗就算大人都唔可以打小朋友架﹗打腳都唔可以﹗打身都唔可以﹗你睇佢喊啦﹗咁係傷害到人架﹗我都要同爸爸講 (我以為佢想投訴我，原來唔係...)，佢都唔可以成日扮怪獸嚇我地架﹗咁都係傷害到人架﹗(喋喋不休...下刪一千字...)
我: 咁我應該點做呀﹗我同佢講完佢都唔聽﹗
大: 你再同佢講囉﹗總之唔可以打人架...(再喋喋不休...下刪一千字...)

最後...比大頭妹鵝咗我幾個車站，一直由坑口，鵝到我係鰂魚涌落車轉車先停...不過老實講，媽媽好多謝你呢幾年教識我做一個好媽媽﹗

大家 LIKE咗我地的 FACEBOOK PAGE未呀？未就快啲 LIKE啦﹗