Sadia 特約：洋蔥豬扒 (附食譜)

繼續我的 Sadia 特約﹗說好的一雞一豬食譜﹗今次要煮的是洋蔥豬扒﹗

其實豬扒有好多種煮法，洋蔥豬扒是我多年前我跟 "阿蘇" 係煤氣中心學的﹗係我比較早期學的中菜，當時剛剛和阿旺搬出來住，要開始自己煮飯洗碗 (未嫁之前有大頭婆婆做嘛﹗)，發覺真係唔可以日日都搞場 "大龍鳳"，煮的時候唔辛苦，因為我鍾意煮，洗的時候就好辛苦﹗呵呵呵...已經係 10年前的事﹗﹗﹗

其實 Sadia 都有好幾款豬扒: 豬梅肉扒﹑豬柳扒﹑有骨豬扒，今次我就揀咗有骨豬扒嚟整 "洋蔥豬扒"，但其實用邊一款都可以﹗

肉的顏色都不錯﹗望落都好有光澤﹗(記得要切開啲筋，咁煎起就唔會卷埋囉﹗)

其實都是一般醃法﹗老抽﹑生抽﹑糖﹑胡椒粉﹑麻油﹑水﹑生粉﹗我自己會再落少少薑汁﹑蔥白，會香好多﹗蒜蓉/ 紅蔥頭就optional...如果屋企有紅蔥頭，我都會落﹗蒜頭我就麻麻地。

有時好想食個黑椒洋蔥汁，我就會煮呢個餸﹗只要煮起的時候加多少少黑椒就ok﹗煮起先落黑椒會香啲，同靚仔啲﹗

洋蔥豬扒

材料: Sadia 有骨豬扒 (1盒有 4年豬扒)/ 洋蔥 半個 (喜歡食洋蔥的，放 1個都無問題)

醃料:  老抽 半湯匙/ 生抽半湯匙/ 糖 1茶匙/ 胡椒粉 少少/ 麻油 少少/ 水/ 生粉 半茶匙/ 薑汁/ 蔥白

汁: 水/ 生抽/ 糖/ 黑胡椒

做法: 

1. 豬扒先一晚解凍，洗淨抹乾水後用刀背剁鬆 (用冷藏豬扒其實可以 skip，冷藏的基本上一定腍)，以醃料醃約 15-30分鐘。
2. 洋蔥切一半，再切 6份 (我鍾意食好腍的洋蔥，所以會切細啲)
3. 燒熱油，加入豬扒煎至金黃色，盛起備用。
4. 爆香洋蔥，想顏色靚啲可加入少少老抽，否則加少少鹽都ok，咁就連洋蔥都好味囉﹗加入己切條的豬扒回鑊煮熟就ok。如果覺得唔夠汁，就自己加少少水﹑生抽﹑糖﹑胡椒 (黑胡椒)，因為醃豬扒時已有生粉，一般煮汁時都唔洗再落﹗呢個汁用來煮薄牛扒都一樣好味架﹗﹗﹗