2016年5月2日 星期一

大頭小丸【童言童語】瑪大肋納篇

 

一直都知 2姐妹性格好唔同。

大頭妹天生就好易教,講道理,黑白分得好清楚,叫佢唔可以做既事,佢就一定唔會做,所以自細都好放心佢,佢覺得有危險既野佢唔會玩,佢唯一既缺點是細膽同怕困難,好多時未試就已經話自己做唔到 。

大頭妹一直最想買的物品之一係頭盔﹗不過佢唔係要 "威",只是佢份人好安全﹗佢可能係世界上唯一想要個頭盔多過 scooter 的小朋友﹗


小丸子可以話完全相反,佢好有主見,唔怕困難,由好細個開始,佢真是有係邊度跌低,邊度企返起身的性格,例如佢踩 scooter 跌倒,佢會專登搬返架 scooter 去跌倒個位再試過,我真是見佢反覆試幾次,無再跌就露出滿意的笑容。

其實邊個乖...邊個百厭...好似真是有樣睇﹗唔信?﹗自己睇﹗




講完佢地 2個既背景,講返今日想講既野﹗

話說大頭妹轉幼稚園之後,比以前多功課,而且都是以中文為主 (以前是英文功課多),所以做功課方面的確比之前吃力,向好的方面諗,當快點適應 9月上小一的生活,到時功課一定唔會少,而且問題是大頭妹成日未開始做就已經叫定辛苦,做一份功課坐既時間多過做。最近學校教 『瑪大肋納嘉諾撤』,有日佢做功課扭計,我就借機問佢,

我: 你想唔想好似瑪大肋納嘉諾撤,長大幫助貧窮的小朋友,教佢地讀書識字呀?﹗
大: 想﹗(我之前都帶過佢同低收入家庭小朋友,一齊學 phonics,不過未出 blog)
我: ok,咁你依家要努力讀書囉,你自己都無知識,大個點教人呀?﹗

之後大頭妹點點頭,好快做完功課無扭計啦﹗


今朝唔知講起咩又講起『瑪大肋納嘉諾撤』,我問大頭妹小丸子想唔想好似瑪大肋納嘉諾撤,長大幫助貧窮的小朋友,教佢地讀書識字呀?﹗大頭妹好快答我想﹗點知...小丸子竟然話...

小:  瑪大肋納嘉諾撤 5歲時佢爸爸就病死咗,之後佢媽媽仲唔要佢走咗﹗
我: ....... (唔識答)
大: 點解佢媽媽唔要佢呀?﹗係唔係佢媽媽唔愛佢?﹗

我輕輕惜咗大頭妹額頭 2下,當時我眼貶淚光,大頭妹又一齊眼紅紅,小丸子就問﹗

小: 媽咪,你做咩有眼淚,見到你有眼淚,我都想喊,不過唔洗喊既知唔知?﹗
(雖然我係佢阿媽,但有時我都好想知呢個小朋友到底咩 "構造")

我: 瑪大肋納無媽媽惜佢,但佢都會去愛人,咁你地有媽媽惜,係唔係更加要做得到?﹗

之後爸爸入嚟﹗

爸: 依家係叫你學瑪大肋納的幫助別人的精神,唔係學佢既遭遇,知唔知道呀?﹗
(的確,有時阿旺比我更加識教小朋友)


今次寫呢篇 blog 寫到喊,好耐未試過寫 blog 寫到喊,不過真是好感激我兩個寶貝女嚟到我既生命,令我學識好多野﹗雖然照顧 2個差唔多年紀的小朋友真是好攰,有時仲好大壓力,不過見到你地 2個既笑容,覺得幾辛苦都值得﹗


沒有留言:

張貼留言

Related Posts Plugin for WordPress, Blogger...