忙

今個星期本身已經忙到不得了，星期一要同小丸子去醫院CHECK黃，星期四要帶小丸子去健康乙院打針，我自己之後仲要上瑪麗抽血，預備下星期二做產後檢查﹗星期五又要再帶小丸子返醫院CHECK黃，點知我仲病鬼咗﹗

我個人一年都唔病一次，打得底我的細菌一定是惡菌，我星期一開始病，起初都是微燒 37.X度，我以為又是乳腺塞咗啦﹗今次小丸子已經塞過2次，一次左一次右，今次右邊都好似有粒石仔，上兩次都是我的陪月員(阿旺)幫我搞掂﹗佢仲要好自豪咁話自己苦練多年的 "XX龍爪手" 終於有用武之地﹗其實真係要好狠先通得返，自己永遠出手唔夠狠﹗之後燒到40度，又發冷，又全身痛，我就知應該係感冒啦﹗比我拖到星期三，阿旺放工先去睇﹗我自己行唔郁呀﹗

為 免我傳染大頭妹，仲帶咗大頭妹去奶奶屋企小住一日，今次是第3次同大頭妹分開呢﹗成晚都好似聽到大頭妹把聲...我一定是太掛住佢啦﹗第2朝問奶奶，佢 "完全" 無搵過我地囉﹗﹗﹗都唔知應該讚佢"叻女"好，定話佢"衰女包"好﹗HEHEHE...不過可能佢似我，我細個出名叫 "四海為家" ，成日去唔同的親戚屋企瞓，但夜晚又唔會喊住返屋企﹗

經過今次...我深深明白...全職媽咪真是無得病﹗今次病一病，夜晚餵夜奶的時候 簡直想死﹗仲要如果大頭妹係屋企佢一定要跟住我﹗依家佢又有 "新招"，就是妹妹一喊，佢就跑去我度，叫我抱佢﹗依家的細路真是好醒...仲以為大頭妹咁細，應該唔識呷醋...原來錯晒﹗﹗﹗

囡呀囡...媽咪好掛住你﹗

頂帽是PLAYGROUP的勞作﹗
HEHEHE...一返到屋企就叫我地睇﹗係咁話HAT﹗