上次大頭妹的時候已經講過一次 (重溫: 媽媽奶大作戰 (上)/ 媽媽奶大作戰 (下))﹗不過今次的經歷有少少唔同，所以再講一次。
今次我生完之後，因為要吊藥，唔可以餵媽媽奶，所以頭2日都無餵過。起初都有少少擔心，聽人講生完之後越早餵越好，而且小丸子頭2日都食開奶粉，餐餐20-30ML，媽媽奶的份量根本就無得比，不過都要試下啦
﹗老實講，頭一日好辛苦，其實根本就未有奶，頭幾餐可能仲有之前的奶粉 "頂住"，食完都無喊。食多幾餐之後，小丸子可能開始 "發現" 唔對路啦...HEHEH...食完都仲會喊
。夜晚的時候，我迫於無奈都要推小丸子入護士房，怕會嘈醒隔離床 (上次我真係一生完大頭妹就無同佢分開過架，除咗要去聽講座)﹗其實我有問護士可唔可以補奶粉，不過護士唔讚成，佢話再唔啜多啲，就更加無奶﹗之後我都唔理小丸子有冇奶食啦﹗總之每2小時餵一次，每次餵30分鐘啦﹗如是者一日之後，又真係有返奶啦﹗只要唔放棄，一樣會成功的
﹗不過明顯地比大頭妹當年少...其實護士話第2胎上奶應該會快啲架﹗即是遲咗餵...真是有分別架
﹗﹗﹗而且大頭妹食得叻過小丸子...小丸子一食奶...5分鐘就瞓...我成日話我的奶是不是有安眠藥
？﹗我暫時由出院到依家都是全媽媽奶，上次返健康院檢查，醫生都話小丸子重得好理想﹗雖然今次的奶量真的不及上次，可能好難可以餵足6個月啦﹗上次大頭妹頭2個月都是全媽媽奶，直到我返工先間中有加一餐奶粉﹗不過我會繼續努力的﹗
提外話: 餵媽媽奶真是幫助子宮收縮的最好方法，上次都唔係太覺，今次可能頭2日無餵，一開始餵的時候，子宮收縮真是勁痛﹗我有問護士，佢話即是代表BB食得岩囉﹗同埋生第2胎的子宮收縮痛過第1胎是正常的，第3胎又會痛過第2胎...
沒有留言:
張貼留言