2013年2月7日 星期四

奶粉荒

最近最熱門的新聞相信都是 "奶粉荒",我都想講下個人意見﹗

男主播日與夜 - 李臻 <母乳不是說餵就餵> (2013年02月05日) am730
夢也想不到會寫關於母乳的事情。全城奶粉荒,政府遲到好過無到,暫且觀察新措施有沒有效。當局亦乘機呼籲港媽餵哺母乳。這陣子也有些人愛說,只要母親願意 餵哺母乳,問題就很易解決。到嬰兒六個月大後,可以吃固體食物,奶粉已不再是主要食糧了。奶粉荒問題是給誇大炒作罷?說這些說話的人,要不是沒有當家長的 經驗,就是像瑪麗皇后,知道人民沒有麵包吃,說讓他們吃蛋糕一樣風涼。(全文: http://www.am730.com.hk/article.php?article=141727)



其 實奶粉短缺,都不是今時今日的事,早在我生大頭妹的時候,已經好難買奶粉 (當時通常只是美贊臣經常缺貨),所以當時大頭妹未出世,我就已經買定一罐,帶著去健康院的時候(買完剛好要做產檢),護士仲問我何不先試下餵母乳就買奶 粉?﹗我心諗 "媽媽奶話有就有咩?﹗"。(尤其依家好多媽媽都 "開刀" 生BB,原來都對餵媽媽奶有影響﹗)

最後我成功餵大頭妹 6個月媽媽奶,罐奶粉食過 1-2次之後就丟咗﹗到小丸子頭 3個月是全媽媽奶 (放了3個月產假嘛﹗),但我今次返工之後,因為唔方便泵奶,每日只可以返工出門前餵一次,放工返到屋企再埋身餵,但因為中間沒有泵奶,奶量好快下降 (真是好快)﹗而且小丸子食量 "驚人" ﹗最後都餵到小丸子 5-6個月,不過第5個月開始其實補好多奶粉﹗

香港依家有幾多在職媽 媽?﹗有幾多個可以一邊返工﹑一邊餵媽媽奶到寶寶 1-2歲戒奶為止?﹗身邊好多媽媽朋友都反映返工好難泵奶,有的真是犧牲午餐的時間,走去商場的育嬰室泵奶﹗又有朋友因為不夠奶,餵媽媽奶餵到壓力 "爆煲",所以就算有朋友問我餵媽媽奶好不好,我通常只是會話 "有就當然餵啦﹗無就食奶粉都一樣啫﹗",我生小丸子的時候,隔離床的媽咪就同我講佢會比BB飲奶粉,佢話佢四兄弟姊妹,得佢一個飲媽媽奶,但就是得佢一 個有 "糖尿病" (所以 20週就已經要入院檢查)。
如果話餵母乳可以解決 "奶粉荒",其實是將 "責任" 放到媽媽身上﹗﹗﹗

又有人話不如媽媽轉奶粉啦?﹗老實講大頭妹大大話話飲過 6-7隻奶粉 (美贊臣﹑美素佳兒﹑日本明治﹑IQ PLUS﹑惠氏(低敏)﹑
雀巢金裝能恩)﹗ 見佢都沒有特別的反應,就是飲日本明治的時候有濕疹﹗﹗﹗其餘的都沒有大分別,便便/ 皮膚都OK﹗所以轉奶粉基本上是行得通的,不過可能好多媽媽會擔心寶寶太細,腸胃會難適應,的確我都有懷疑,大頭妹不太 "好" 奶,是不是跟我成日轉奶有關?﹗有大頭妹的經驗,今次我幫小丸子選了雀巢金裝能恩,一來貨源穩定,二來都是大頭妹的醫生介紹 (低敏奶粉),所以其實今次奶粉荒對我的影響不大﹗上次在家附近的萬寧買奶粉的時候,見到有好多,我都想影張相放上FACEBOOK,不過之後怕引來一班水貨客,都打消念頭﹗

不 過我覺得今次奶粉荒最可悲的是引發 "中港矛盾",老實講...作為一個媽媽,內地媽媽點解要來香港奶粉,我地好 "清楚",什麼三聚氰胺/ 大頭奶粉,但清楚唔等於 "諒解" ﹗尤其是影響自身的時候,香港的奶粉供應,本身就是供應比我地香港小小一個地方,一年最多幾萬個BB,忽然要供應埋內地的BB,"短缺"是理所當然﹗

男 主播文中有提及香港的產假短,如果增長產假,可能有助母乳餵哺,但作為過來人,如果政府再增加產假,可能好多媽媽都好難再從返職場,就好似我的例子,放完 第2次產假返到公司,好明顯老闆不太高興,好彩沒有被炒魷魚,我想信如果產假是 3-4個月,好多老闆對請已婚未有小朋友的女職員都會好小心﹗

最後只是想講...在香港做在職媽媽真是非常艱辛﹗爭床位﹑搶 (購)奶粉﹑尿片﹑爭學位/ 做升學顧問...不要講優質的親子時候,夫妻相處都好成問題﹗政府仲叫人生3個...真是不要講笑啦﹗

沒有留言:

張貼留言

Related Posts Plugin for WordPress, Blogger...