2013年11月18日 星期一

大頭妹3歲半成長日誌

其實已經無再好似之前咁個個月出成長日誌啦﹗不過今個月有野要記低,就寫係成長日誌啦﹗因為件事都算係大頭妹成長嘅一部份﹗

我成日都講...大頭妹係個乖小朋友,比起小丸子,佢真係好易湊,一向都好聽話,又好少扭計,就算扭都好少超過 5分鐘,而且一啲 "殺傷力"都無﹗但唔知點解,最近成日扭計話唔返學﹗好似係 11月開始...每個朝早一起身都話唔返學,仲要係不停喊,停一陣,出門口又喊過﹗

我起初以為係唔係因為夜瞓啦?﹗試過早啲瞓又好似無分別﹗之後我又諗...係唔係因為今年轉咗國際班,聽唔明老師講咩,所以唔想返學呢?﹗問佢鍾唔鍾意老師,佢又話鍾意喎﹗(其實我直頭已經想幫佢問轉返去本地班架啦﹗以前返本地班都未試過話唔返學嘅?﹗)

除咗唔返學,我地仲發現有問題個段時間大頭妹食多咗手指,我地最近參加咗 RTHK天下父母心 - 與孩同行節目,請專家幫大頭妹戒食手指,由 10月初開始,本來已經有改善,最近又差返﹗
 
後來終於比我問到佢有咩問題啦﹗原來佢話同學S "嬲" 咗佢,同學S推佢,老師要同學S向佢道歉,同學S唔肯道歉,之後仲嬲咗佢﹗起初我都不以為意,諗住小朋友問題就由得小朋友自行解決啦﹗如是者...2個星期都話唔返學...佢仲話同學S嬲咗佢,佢好驚﹗唔想返學﹗我開始諗係唔係真是因為同同學相處問題,所以唔想返學呢?最後都是決定問一問班主任﹗

我打去問老師大頭妹平時上堂嘅情況,老師話大頭妹開學的時候唔係太專心,可能聽唔明,依家已經開始識跟指示做,同同學相處好開心,唯一係成日返到學校都唔記得換鞋。之後我就問老師有冇一個同學S,老師話有,我就同佢講返件事,因為叫同學S道歉嘅係另一位老師,佢話佢都要了解下,不過都會再同佢地傾下。

之後我返屋企同大頭妹講老師聽日會同佢傾下同學S同佢嘅事,佢話OK,到第2日放學,我問老師有冇同佢傾,佢話有,不過同學S仍然無笑。我同大頭妹講 "其實唔係人人都鍾意笑,我知道你好鍾意笑,爸爸媽媽又好惜你,但唔係個個小朋友都鍾意笑,同學S唔笑,唔一定係因為嬲你,可能佢有其他唔開心嘅事都唔定。"。之後大頭妹話 "好啦﹗咁我原諒佢啦﹗"。(同學S唔好意思啦...為咗個囡...我老屈咗你唔鍾意笑)

出奇地,第2日朝早起身,大頭妹真係無再扭,一叫就起身﹗我未問返老師到底同佢講咗咩,不過事件應該 "解決" 咗﹗我地仲發現佢同時食少咗手指﹗希望大頭妹真係覺得自己解決咗一個問題,已經大個囡,可以戒埋手指啦﹗


Halloween 個日,返學仲好開心﹗

平時日日返學都好開心﹗

Halloween 個日有得化妝就仲開心﹗


點知...之後就變成咁﹗

日日返學都喊到豬頭咁﹗你話媽媽有咩辦法唔擔心﹗


7 則留言:

  1. 心結解開應該就冇事, 加油!

    回覆刪除
    回覆
    1. 其實我無諗過佢地咁細個就會有朋輩相處問題...佢話個同學都仲有無笑,佢覺得個同學仲係嬲佢架...不過...都真係要靠佢自己解決問題啦﹗

      刪除
  2. 早排工人放大假, 我的BB (PN)也是一上學又哭, 又不肯換校服, 99成日要帶套校服出去先找地方換. 現在工人回來了, 好像又變正常.

    回覆刪除
    回覆
    1. OH...我上次轉工人時都係咁呀﹗

      刪除
  3. 小朋友到左呢個年齡就會開始好著重朋友既關係~
    所以都可以教下佢處理朋友關係既野~
    大頭妹要加油呀!!
    哈哈~讀書讀上腦tim~ =]

    回覆刪除
    回覆
    1. hahahah...你讀幼兒教育?其實我都唔識教佢點處理佢嘅朋友關係...我估唔到原來 3歲幾就會有同朋友相處問題...

      刪除
    2. 我係讀Nursing 嫁`
      啱啱讀完小朋友發展~
      或者可以試下角色扮演~
      eg: 玩緊公仔個時`可以講下d 情況俾佢聽~
      問下佢會點做~聽完佢講~
      再教下佢應該點做先好d~

      刪除

Related Posts Plugin for WordPress, Blogger...