天下父母心- 與孩同行

好想同大家分享一下﹗大頭妹參加咗RTHK今一輯 "天下父母心 - 與孩同行"﹗點解我地會參加呢個節目呢？﹗之唔係要大頭妹戒食手指囉﹗我地係拍攝嘅時候，有見幼兒方面嘅專家，真是學識好多野﹗教小朋友其實真是有得學，亦需要學﹗

老實講...我唔係太介意佢食手指，我自己覺得食手指嘅小朋友其實乖啲...HEHEH...唔係乖嘅小朋友會食手指，我話食手指嘅小朋友乖啲...因為佢地食手指...其實係有 "自我安慰" 嘅作用﹗好似我有咩唔比佢做，佢會自己行埋一邊食下手指，好少會發脾氣，小丸子無食手指，無食奶咀，佢嘅野蠻程度真是好高，會尖叫﹑打人...樣樣齊﹗(真係唔知係唔係有咁岩得咁橋啦﹗)

嘅然我話食手指乖啲，咁點解又要戒呀？之唔係 "人言可畏" 囉﹗其實我都唔介意人地講呀﹗不過...我怕大頭妹開始聽得明，會影響佢自信心囉﹗而事實上我地同專家傾過，我地覺得大頭妹缺乏自信，佢都認為如果大頭妹可以成功戒食手指，對佢自信心都會有提升﹗

首先講下大頭妹食手指嘅心路歷程先啦﹗佢自 3個月開始食手指，之後到10個月開始食得多，起初可能係瞓之前先食，我地都覺得合理，小朋友唔係食手指，就係食奶咀啦﹗我當時揀比佢食手指。但越大個，食嘅時間反而越來越越長，到之後返學，老師打比我通常都係同我講 "佢係學校都幾乖，不過成日食手指，你地有冇幫佢戒呀？"，之後見家長，老師話佢已經食到全班同學都跟佢一齊食﹗

其實我地都用咗好多唔同方法同佢戒架啦﹗手指苦水 (頭幾日有效，之後一見就喊，但用完都照食)﹑辣椒仔 (食完飲完水就無事...又要怕佢整到眼睛...所以放棄咗)﹑白花油 (佢直頭鍾意...)，同專家傾過，佢覺得我地唔夠 "恆心" 同 "忍心"，專家話佢呢個習慣跟咗佢 3年，我地成 日每個方法試 3-5日唔得就放棄，肯定 "鬥" 唔過佢 3年來嘅習慣﹗呢點我都好認同...所以專家幫我地 set 一個 3星期嘅計畫，透過 "獎勵" 去幫大頭妹戒食手指，而我同阿旺同時亦要戒一個壞習慣，等大頭妹唔好覺得只有佢一個有問題，戒嘅時候感覺會好啲﹗

hehehehe...想知最後大頭妹戒唔戒得成？﹗就要留意今晚 ATV 7:00 - 7:30 嘅 "天下父母心 - 與孩同行" 啦﹗

依家就比啲幕後花絮大家睇下啦﹗

影大頭妹返學...因為佢每日坐地鐡都食手指...

  又影下佢平時係屋企嘅情況﹗

兩個不停搗亂﹗

又影下出街嘅情況﹗

呢日去迪士尼...因為儲夠 16個貼紙啦﹗HEHHEHE...仲有 MANCENT一齊玩﹗

天下父母心 與孩同行:
http://programme.rthk.hk/rthk/tv/programme.php?name=tv/parenting2013&p=6003
https://www.facebook.com/rthk.parenting2013