洗鼻鹽水

2 個囡輪住病，大頭妹成日 2行鼻涕，最近氣管敏感又嚴重咗﹗今日班主任直頭打比我問我有冇人可以提早去接大頭妹放學，話佢咳到好辛苦咁，不過無發燒﹗小丸子又係，成日 2行鼻涕，阿旺話好耐都無聽過佢氣管係清的，成日都有啲 "hur hur" 聲﹗最慘係夜晚瞓覺，2個一瞓底就鼻塞。大頭妹鼻塞就好忟，但瞓到。小丸子就唔識忟，不過就瞓唔到。星期六帶大頭妹去睇醫生，講起星期三同佢去完公園佢就不停咳啦﹗醫生即刻話依家空氣污染水平咁高，其實係唔應該帶小朋友去公園，銅鑼灣都唔好去﹗空氣污染指數過 100，有氣管問題的小朋友應該留係屋企﹗大家媽媽真係要好好記住﹗

有 BLOG友媽媽教我用洗鼻鹽水可以幫助通鼻塞，仲可以放個切開一半的洋蔥係床頭，都可以幫助通頭塞，話外國其實好普遍，因為佢地其實唔會隨便比小朋友食藥 (上次同小娜執媽講起，佢都話美國的醫生只會開退燒藥比BB，成日帶小朋友去睇完醫生都唔會有藥食﹗)。其實之前小丸子都用過洗鼻鹽水，去ST PAUL睇醫生，醫生開咗支細細地的鹽水，話可以幫助舒緩鼻塞，小B唔好食咁多藥，可以用鹽水噴下鼻，工人姐姐話用完之後，有時啲鼻水會自己流出嚟，不過細細支一早用晒﹗

之後我LUNCH TIME又走去買咗支安鼻靈潔鼻海泉，我見佢話100%天然成份，嬰兒都用得，仲話有幫洗走致敏原，有助減少過敏，即係阿旺都用得﹗佢成日都鼻敏感，去親某大型時裝店都打噴嚏 (所以我好少係呢間野買BB衫，雖然啲款又靚又唔貴)。

唔打功效啦﹗大家自己睇啦﹗

哈哈，用完之後發現佢仲有一個好處，就係同大頭妹清潔鼻孔的時候易咗 (不過佢會反抗)﹗講起上嚟，又比我發現工人姐姐的偏心野，點解我從來未見過小丸子有鼻屎痴住個鼻，但我成日放工返屋企都要幫大頭妹挖鼻屎？﹗定係 BB係無鼻屎嘅呢？﹗