2013年10月21日 星期一

小丸子第一次幼稚園面試 (啟思)

上星期六,小丸子剛完成了人生的第一個 interview﹗

其實由幾時開始,幼稚園就要開始 interview呢?我個年代 bb出生率都好高,讀幼稚園都好似唔洗 interview架?﹗1歲半人仔就要 interview,都唔知考佢地啲咩?﹗我地今次去面試嘅係啟思,不過不是九龍塘的一間,後來同 playgroup的老師講起,九龍塘的一間問多幾條問題架﹗

今次面試都好快,9:00開始,我地大約 8:40去到,係門口排隊,9:00就準時開門入去啦﹗比完報名費,就差不多已經可以入房,不過入到房都唔係即刻 interview,會比小朋友玩一陣玩具先﹗今次同大頭妹個次好似有少少唔同,形式唔同咗,上次係 group interview圍圈考,今次係 individual sit down interview﹗

之前見有家長話會問小朋友叫咩名,今次就無問,老師一坐低講完早晨,就指住我問小丸子 "呢個係邊個呀?",小丸子望下我無答﹗

之後老師攞咗隻鴨仔出嚟,我估都會睇下小朋友識唔識講 "鴨/ duck",小丸子都係無出聲。之後老師上鏈,同小丸子講叫佢一陣要捉住鴨仔,小丸子接咗鴨仔,老師攞返又再做多一次,小丸子再接,之後佢要小丸子上鏈,再比返隻鴨仔佢,小丸子上完鏈,唔識將鴨子放向老師的方向,老師叫佢比媽咪,小丸子比完隻鴨仔我,老師就叫我比返佢。

之後就玩 "形狀",要放唔同形狀,是小丸子的強項,除咗梯形第一round放唔入,最後放晒全部形狀,老師再叫佢試多一次,都放得入,不過佢平時係屋企玩,會自己一邊玩一邊講 "star, square",今日就無啦﹗

最後老師攞咗本書 (soft book)出嚟,叫小丸子打開,然後再問內容,叫佢指返出嚟,第一版係樹同葉,叫佢指樹,小丸子做到﹗之後叫小丸子 "揭" 書都揭到,但之後兩版,小丸子就無答老師問題啦﹗其中一條係草同梨,我問小丸子邊個係 pear,佢就指自己耳仔 (ear),之後就係度自己玩 peekaboo﹗(老實講...我覺得呢PART好似幾 ADVANCE喎﹗以前大頭妹都係問下眼﹑耳﹑口﹑鼻,又或者是生果蘋果﹑橙,但今次竟然已經去到問物件?﹗定係歲幾的 BB其實已經好聰明,係我低估咗佢地?﹗)

Interview完啦﹗老師去到門口送貼紙比小丸子,我唔記有冇叫小丸子講多謝﹗好似無多謝老師添﹗佢貼完比小丸子,再比多一張小丸子,叫佢貼係媽媽度,小丸子貼再一陣先貼到,不過唔知呢 part係唔係都係 interview的一部份啦﹗但唔記得講多謝,就始終唔係咁岩啦﹗大家要留心啦﹗我當時太緊張小丸子貼唔貼到張貼紙,咩都唔記得晒﹗


哈哈﹗其實唔知係唔係因為唔係考九龍塘區名校,我地好似著得 "隆重" 咗﹗

出發的時候好似好醒目﹗

嘩﹗Monster搶電話,唔好比老師見到你呢個樣呀﹗

排隊啦﹗

interview完先 9:30,仲夠時間上 playgroup﹗


食得幾津津有味?﹗食香蕉片﹗


仲有手指餅﹗

11月1日就有結果啦﹗不過信心都唔大,因為上次大頭妹考完,老師會問下會唔會考慮下午班,我見有啲家長今次見到都話有問,但今次老師無問我呢﹗結果待續﹗


大家 like咗我地嘅 facebook page未呀﹗請多多支持﹗


9 則留言:

  1. 之後就係度自己玩 peekaboo... 哈哈哈... 好 cute!!!

    回覆刪除
    回覆
    1. heheheh...不過老師唔會因為佢玩 peekaboo而收佢呢...仲可能會因為咁叮走佢...

      刪除
  2. 嘩, 乜考得咁鬼深0既
    1歲多0的咋喎, 唉, 死啦, 我都好驚細佬攪唔掂, 個人好似啞巴一樣咁

    回覆刪除
    回覆
    1. 平時聲大大的小丸子都無出咗聲...所以考試的時候真係好難講,可能細佬會比個驚喜你呢﹗佢幾時 interview?

      刪除
    2. 佢2/11呀
      真係超擔心呀, 今年咁大競爭
      大家都GOOD LUCK 啦 :)

      刪除
  3. 原來考咁深, 咁多野, 睇完我覺得細B真係....無咩機會.

    回覆刪除
    回覆
    1. 係...我覺得今年的內容深咗...

      刪除
  4. 回覆
    1. 哈哈...如果唔係我無幫大頭妹報 k1,我要連續玩4年...再接住玩小學入學...

      刪除

Related Posts Plugin for WordPress, Blogger...