2014年1月20日 星期一

香港動植物公園@20140112

話過 2014唔做宅媽﹗頭威頭勢...上星期日去完 Pixture 自拍 studio之後,再去香港動植物公園﹗本身 studio對面就有 23號,一去到巴士站仲即刻有車,不過見無位坐,最後都係坐的士上去﹗因為阿旺影完相約咗同學仔做功課,得我同大頭姨姨,我怕我地搞唔掂﹗

我記憶中自己未去過香港動植物公園 ,又或者太細唔記得,我成日以為佢係香港公園附近,原來都唔係太近﹗見上次去泰國布吉動物園,佢 2個睇動物睇得好開心,返嚟就一直想同佢地去香港動植物公園,不過香港嘅公園比較安全,同動物嘅距離都幾遠,好似睇得無咁開心﹗

小丸子好似好鍾意睇動物,大頭妹就點都唔肯落車仔﹗可能佢怕佢落車,我地會比妹妹坐﹗

睇見啲 monkey打鞦韆,小丸子好開心﹗

小丸子仲想穿入去個草地...

見大頭妹好似唔大興趣,坐係車仔食手指 (我懷疑佢坐係車都睇唔到,但佢又唔肯落地),都係同佢地去公園好過﹗

小丸子幾好身手﹗


大頭妹係一個好守規矩嘅人,玩要排隊,一定要由樓梯上﹗小丸子就是一個無視 規矩嘅人 (可能未識啦),去到公園成日聽到大頭妹叫 "唔可以咁樣架﹗",旁邊個家長以為大頭妹同佢個小朋友講...因為佢個小朋友同小丸子一齊係滑梯爬上去,同大頭妹講唔好意思...hehehe...我唔好意思就真...


最近大頭妹班主任打比我,佢話佢叫同學唔好跑,同學唔聽,佢就喊...叫我返去要同佢講,有問題要同老師講,唔好喊﹗




呢兩個小朋友就醒啦﹗一玩完落山,兩個一齊瞓咗,一個坐車,一個要抱,又得我同大頭姨姨,狼狽非常﹗因為我地唔係坐巴士上去,又唔知個巴士站係邊﹗最後我地行返落中環,坐 722 直接返屋企﹗第 2日我週身骨痛呀﹗


上星期五,爸爸要返學,我地落街食飯,再去 game centre玩﹗

每次只玩 2個遊戲﹗

佢地都知規矩,玩完唔會扭,會自動跟我走﹗最近大頭妹醒咗,會問可唔可以去睇玩具﹗"睇"字好重要,佢之前扭過我幾次,我都無買,依家已經唔會扭﹗佢最近話想要部 scooter,我話如果佢介到食手指就買比佢﹗希望快啲買到啦﹗

hehehe...希望小丸子大個都會好似大頭妹咁乖咁聽教﹗

真是要好好珍惜未有讀書考試嘅童年時光,依家係 facebook,見啲小學家長朋友,成日都係陪囝囡溫書又溫書,真係好大壓力﹗依家有得開心時,就盡量開心啦﹗

6 則留言:

  1. 其實呢,個公園近廁所果度有條樓梯上公園上面既行車天橋,行到上去的話就會見到23號巴士站架喇 :) 你地就可以搭到落金鐘再轉車 :)

    回覆刪除
    回覆
    1. 唉...我地本來就係想上個條樓梯,但因為拎住車仔行咗另一邊,之後睇 google map又行錯方向,問個security又比佢老點行落山...算啦﹗我覺得唔多野玩,下次都未必會考慮佢﹗

      刪除
  2. 未有考試既時間真係好珍貴~
    真係要好好珍惜~
    如果唔係到時~ 想同佢地去玩都無時間~
    加油~ 希望你可以keep 住同佢地去多d 地方玩~

    回覆刪除
  3. 細個嗰時成日去呢度玩架!! 反而依家有小朋友就好少去~~

    回覆刪除
    回覆
    1. um...其實我覺得唔算多野玩,我地岩岩星期日去錦田鄉村俱樂部多野玩好多﹗

      刪除

Related Posts Plugin for WordPress, Blogger...