COMPLETELY RUBBISH

上星期日，帶大頭妹去OB的生日會﹗本來都開開心心的﹗誰不知出席的仲有一位有 “暴力傾向” 的小朋友﹗個小朋友讀K1，即是大約3歲啦﹗我覺得應該都要有基本 “對錯” 的認知﹗佢竟然一而再﹑再而三打小朋友，佢父母仲要只是講 2句 “WHO’S NAUGHTY BOY？/ NAUGHTY﹗/ IT IS VERY BAD﹗” 就算﹗個細路唔識，個大人應該識啦﹗個大人都完全無歉意，叫個細路道歉，個細路無做，個大人是不是應該道歉呢？﹗連脾氣同量度都好好的阿旺，都要用 “大開眼界” 來形容﹗

事情的來龍去脈是這樣的﹗個小朋友玩一個會發聲的學行玩具﹗大頭妹又走過去玩，之後攞起個玩具電話，個小朋友即刻搶返，再推大頭妹落地﹗後腦 “磅” 一聲撞落地﹗由於事出突然，我都唔識做反應，有人問咩事﹗我就話個小朋友推大頭妹﹗之後個媽咪仲要問個小朋友有冇推﹗我心諗你覺得我屈你個小朋友？﹗之後個爸爸就問佢點解要推人﹗佢媽咪仲話是因為大頭妹搶佢的玩具﹗我即時都講是大頭妹先玩的﹗之後…DEAD AIR一陣，大家都當無事發生﹗對方又唔係我朋友，我又係一個生日會當中﹗我可以點？﹗帶大頭妹即走？﹗我唯有叫阿旺寸步不離貼身保護大頭妹囉﹗之後大頭妹同OB玩玩具，佢又去末收﹗又打OB，同推佢落地(完全無原因)﹗佢父母一樣無反應﹗

可能一直無發洩心中的怒火﹗成晚都瞓唔著﹗3:30A.M.叫醒阿旺比我鬧，一直鬧到 5:00A.M.﹗阿旺話經一事長一智，話下次再帶大頭妹同其仔小朋友玩的時候，就識得睇實大頭妹﹗我覺得最激氣的是個小朋友家長的態度﹗2個香港人父母教到個小朋友唔識廣東話仲好似好威咁﹗比幾多錢送個小朋友去國際學校讀又有什麼用，連基本的品行都沒有好好教導﹗比我的感覺上，佢地覺得只要小朋友學識英文就可以啦﹗其他都不重要﹗身為香港人都唔學廣東話，擺明唔想同我地呢啲平民百姓 “交往”，我地高攀了人，個囡比人推一下是應該的﹗原來世界上真的有這樣的的父母？﹗將來的世界會變成點？﹗我唯有學唐司長講一句 “COMPLETELY RUBBISH﹗”。